Dom Virgílio Husu Amlulik Banati Tuir Jesus

0
75
Bispu Dioseze Dili, Dom Virgílio do Carmo da Silva, SDB ordena diákonu Aderito de Savio Sequeira, ho Mariano Neto de Carvalho, iha Igreja katedrál Dili. Foto Agapito dos Santos

DILI, (TATOLI) – Bispu Dioseze Dili, Dom Virgílio do Carmo da Silva, SDB, husu ba amlulik sira iha sira nia moris atu banati tuir Jesus Kristu hodi serve kreda no sarani sira.

“Imi nia kaderneta ne’ebé riku ho relasaun ninian la’ós halo furak de’it ba loron ohin no depois ne’e hatama tiha iha gaveta maibé tenke lee no uza nafatin iha imi nia knaar vokasaun nian hodi serve maromak, serve kreda no sarani sira,” Dom Virgílio do Carmo da Silva apela iha serimónia ordenasaun sacerdotal ba Diákonu Aderito de Savio Sequeira no Mariano Neto Sai Na’i Lulik, iha igreja Imaculada Conceicao da Virjen Santa Maria nu’udar padrueira igreja katedrál Dili ba tinan 25, Sesta (8/12).

Iha omilia,  Dom Virgílio husu ba na’i lulik foun na’in rua nee atu banati tuir moris Jesus Kristu hodi serve kreda no sarani sira.

Aleinde ida ne’e, husu atu hatudu loloos identidade nu’udar na’i lulik hodi serbí tuir mistériu Na’i Maromak Nian.

Entretantu  Padre Aderito de Savio Sequeira, mai hosi Munisípiu Oe-cusse no padre Mariano Neto de Carvalho husi Fatu-besi, Ermera.

Tuir oráriu padre Aderito de Savio Sequeira  sei hala’o misa nova no misa agradesimentu  iha parókia são Miguel Arcanjo iha loron 15 Dezembru, no iha kapela Nossa señora de Assunção, Banoco Oe-cusse,  iha loron 18 Dezembru.

Enkuantu, padre Mariano Neto de Carvalho sei selebra misa moruk iha parókia Nossa Senhora de Lourdes Ermera  iha 9 Dezembru no misa agradesimentu iha estasaun misionáriu virjen peregrina Fatu-besi 12 Dezembru.

(jornalista Agapito dos santos)

(Editór : Manuel Pinto)

HUSIK IDA HATÁN