Banda Múzika Haat Angaria Fundus Ba Estudante Kbiit Laek

0
79

DILI (TATOLI)–Banda múzika haat hanesan Família Alcatraz, Lulik ba Dame, K-Kout no Korro Senofa realiza konsertu angariasaun fundus iha Jináziu Semináriu Menór Balide, Dili, kinta (21/ 12) kalan.

Karidade Natal (TO BE MEN AND WOMEN WITH AND FOR OTHERS) mak sai hanesan tema jerál ba Konsertu Angariasaun Fundus ida ne’e no sub tema mak “La´o hamutuk ho Asaun karitativa hodi hakat ba selebra festa Natal”.

“Objetivu hosi eventu ne’e mak lolo liman hodi tulun estudante sira ne´ebé ekonomikamente kbiit laek, maibé intelektualmente sira iha kapasidade, iha vontade di´ak, badinas estuda hodi hakle´an liu-tan sira nia koñesimentu,” reprezentante banda múzika tolu, Pe. Augusto Martins hato´o asuntu ne´e liuhusi konsertu refere.

Amu Martins esplika katak referénsia ba sira hodi kria atividade ne’e mak Evanjellu Saun Mateus ne´ebé ho lema dehan “Ha’u hamro’ok, imi fó we. Ha’u hamlaha, imi fó han”.

Estudante benefisiáriu hosi atividaade ne’e hamutuk na´in ualu (8) mak hanesan: Juvita Dias Rodrigues Pereira no Jorge Gonçalo Name hosi Laclo (Manatuto), Cristina Febriana Felícia Odja Nunes no Juvina da Costa Amaral hosi Same-Manufahi, Natália Tomásia Atok no Miguel Fuca Elo hosi Oe-Cusse no Agustinho de Jesus no Deolinda Soares hosi Ermera.

Jorge  Gonçalo Name, estudante hosi eskola S. João Paulo II, Laclo, expresa nia sentimentu hanesan benefisiadu ida. “Ha´u haksolok teb-tebes tanba  banda haat ho fuan boot hakarak ajuda ami na´in ualu nia eskola,” nia dehan.

Nune’e mós, estudante hosi  Eskola Sto. António Oe-Cusse, Natália Tomásia Atok agradese tanba bele hetan ajuda. “Ho fuan laran hakarak agradese ba Maromak ne’ebé hasuli ona nia grasa mai ami liu hosi banda haat ne´ebé ho laran luak  buka osan hodi tulun  ami nia estudu iha tinan akadémiku 2018. Ho ajuda ida ne’e ha’u sei haka´as án nafatin estuda hodi sai ema ne´ebé matenek,” nia tenik.

Enkuantu, Xefe Komisaun Organizadora ba eventu refere, Marcos da Costa, hato’o  agradesimentu ba apoiu tomak hosi parte hotu hodi realiza konsertu angariasaun fundus ho di´ak. Tanba ne´e, nia hato’o agradese wa´in ba patrosinadór sira hanesan Semináriu Menór Balide (SENOFA), J5-pro, TALITI, Media Printing MAX Ads, GMN-TV no Sentru Televizivu Dioseze Dili.

Marcos esplika fundus ne´ebé komisaun uza hodi realiza eventu ne’e ho montante $ 250,00. inklui produz Billete.  Billete ne´ebé mak komisaun prepara iha oin rua, konsiste $2 nian hamutuk follas 250 no konsege fa´an follas 78. Billete $20 nian hamutuk follas 45 no konsege fa´an hotu.

Nia salienta orsamentu ne´ebé hetan hosi fa´an billete ho mintante $1,117.000 no hosi kaixa kontribuisaun $42.15. Totál fundus ne´ebé hetan hosi konsertu ne’e ho montante $1,159.15.

(Jornalista: Xisto Freitas)

(Editór : Manuel Pinto)

 

HUSIK IDA HATÁN