Área Tasi-Ibun Munisípiu Dili Hahú Hetan Abrazaun no Erozaun Maka’as

0
38
Ezemplu abrazaun ne'ebé akontese iha Java Leste, Indonézia. Foto google

DILI, (TATOLI)- Rezultadu peskiza hosi Organizasaun Naun Governamentál (ONG), Konservasaun Flora no Fauna (KFF), hatudu katak área tasi-ibun munisípiu Dili hahú hetan abrazaun (erozaun iha área tasi ibun) no erozaun maka’as, tanba ne’e KFF husu ba Governu atu buka solusaun di’ak ba problema ambiente hodi bele rezolve kestaun  sira ne’ebé komesa afeta ba abitante ne’ebé moris besik iha tasi-ninin.

Selebrasaun Loron Voluntáriu Internasionál ne’ebé monu iha dia 5 Dezembru liuhosi atividade kuda ai-parapa iha Hera. Foto KFF.

Ho ida ne’e KFF hala’o atividade kuda ai-parapa hanesan dalan ida atubele evita abrazaun ne’ebé akontese daudaun ba ema sira-nia hela-fatin besik tasi-ibun komesa lakon tanba kauza husi abrazaun ne’ebé akontese iha suku Hera nian.

Aleinde ne’e akontese mós iha tasi-ibun Metinaru no Kristu Rei tanba impaktu husi abitante sira ne’ebé tesi ai-parapa no husi parte tasi iha Praia dos Coqueiros (Pantai Kelapa) no Tasi-Tolu impaktu husi rezidente sira ke’e rai-henek.

“KFF husu governu tau atensaun maka’as ba problema abrazaun no proteje ai-parapa iha área tasi ninin tanba ai-parapa hanesan tipu floresta iha área tasi-ibun ne’ebé bele fó sustentabilidade ba komunidade kosteira nia moris”, Alito Rosa, peskizadór husi KFF, hatete bainhira selebra Loron Voluntáriu Internasionál ne’ebé monu iha loron 5 fulan-dezembru liuhosi atividade kuda ai-parapa iha Hera.

Tanba loron ne’e importante tebes ba ema iha mundu liuhusi halo atividade voluntáriu ho tipu oioin.

Eventu ne’e hanesan parte ida hodi proteje Timor-Leste nia ambiente tanba kada tinan floresta ai-parapa hetan degradasaun, impaktu hosi ema nia atividade ne’ebé latau importánsia ba ai-horis ne’e iha área tasi-ibun, maske komunidade barak mak moris depende ba ai-parapa hanesan buka ikan, kadiuk, boek, karakól no buka ai-sunu.

Maski nune’e ai-parapa importante tebes tanba bele proteje ema hosi dezastre naturál liuliu anin-boot, tasi sa’e, nomós próteje rai-maran hosi abrazaun no erozaun.

Eventu ida ne’e hetan partisipasaun hosi voluntáriu International Japan International Cooperation Agency (JICA) iha Timor-Leste, membru hosi Lenuk Dasscuba School Timor-Leste, Cruz Vermelha de Timor-Leste (CVTL) no KFF tomak.

Jornalista: Maria Auxiliadora

Editora: Rita Almeida

HUSIK IDA HATÁN