Aprende Atu La Arepende

0
186
Elizabeth Rita Maria Belo

DILI, (TATOLI) – Keta ezije liu ita-nia direitu se ita seidauk kumpri ita-nia dever, signifika hakaas án uluk atu estuda tanba ita-nia án sei rezulta benefísiu mai ita-nia án rasik.

“Aprender para se não arepender” eh aprende atu la arepende ho lema ne’e mak motiva ha’u no ida seluk mak jangan tergantung pada yang di gantung, signifika se ita aprende ita sei la arepende no ho aprende ida nee ita mós koko atu labele depende de’it ba ema seluk se ita rasik bele halo.

Ne’e mak mensajen husi Elisabeth Rita Maria Belo, mellor estudante siénsia sosiál iha ezame nasionál tinan letivu 2017 husi Eskola Sekundária Santo António (ESSA), Baukau ba estudante sira iha Timor-Leste, husi Munisípiu Baukau, postu administrativu Baukau Vila, Suku Tirilolo, aldeia Betulale, kinta (21/12).

Elizabeth Rita Maria Belo hamutuk ho nia kolega estudante sira husi ESSA Baucau. Foto espesiál

Estudante ho valór ezame nasionál 48 ne’e hateten rezultadu ne’ebé iha, agradese tebes ba Maromak tanba konsidera hanesan milagre, tan ho Nia espiritu akompañamentu nia bele realiza ezame ho di’ak ho hetan valór ne’ebé sufisiente.

Nune’e mós ba inan-aman nu’udar naroman eh lalenok moris nian inklui belun eh kolega sira nia motivasaun durante estudu, hahú husi primária to’o sekundária.

“Ha’u sente orgullu tanba ha’u-nia esforsu durante tinan tolu aprende iha ESSA Baukau la saugate signifika la’ós de’it ha’u mak susesu maibé ha’u-nia edukadór no edukadora sira mós susesu hotu”, hateten Elizabeth ho naran estimada Nyza nu’udar grasa Maromak nian no fuan domin husi Natercia Freitas no Dario Belo, ba ajénsia TATOLI.

Feto-oan, isin mutin, fuuk-been no sempre hamnasa midar ne’e haktuir valór ne’ebé nia hetan, maske envolve iha atividade sosiál no pastorál oin-oin hanesan membru Parlamentu Foinsa’e reprezenta postu Administrativu Baukau vila, grupu akolitus, Laura Vicunha iha Dioseze Baukau ne’e ho oráriu ne’ebé nakonu buka jere nafatin tempu hodi estuda.

“Ho atividade hirak ne’e sempre tabrak (engarafada) dalaruma ha’u la iha tempu atu estuda maibé ha’u buka meius oi-oin atu maneza ha’u-nia tempu hodi halo atividade no tempu atu estuda no tempu estuda nian mak iha kalan no ha’u aproveita tempu balun iha eskola bainhira mestre la tama iha aula”, konta Nyza bin boot husi alin sira hanesan Ana Tinezia Freitas (Titi), Elodie Suelem Rosaria Freitas Belo (Ila) no Anatolio Andrei.

Elizabeth Rita Maria Belo ne’ebé moris iha loron 5 agostu 1999 ho zodiaku Leo ne’e dehan, nia inspirasaun moris mak família basa tuir família mak nu’udar huun no abut ba moris nian.

“Família mak ema ne’ebé besik liu no sai mós ezemplár ba ha’u hodi fó enerjia pozitiva no espiritualmente hodi ha’u hakat atu hetan futuru nabilan, iha loron aban bainrua mai”, dehan tan Nyza ne’ebé nia preferénsia iha atividade livre mak kanta, toka viola no halo paseiu ne’e.

Nyza husi ESSA, iha munisípiu ne’ebé kuñesidu ho Kulugisa ka kulu tunu ne’e konta tuir nia abilitasaun literaria katak nia hahú estuda iha eskola primária, Sekolah Dasar Negeri, SDN 1 Baukau, iha 2006, tuir mai ba iha ensinu báziku 1, 2 no 3 siklu iha Aubaca, Triloka, Baukau, iha 2014 ikus mai sekundária iha ESSA, Baukau termina iha tinan ne’e ho valór 48, katak valór aas liu entre eskola hotu iha nível nasionál espesialmente siénsia sosiál.

Baukau oan ne’ebé gosta tebes kór mean ho metan ne’e informa atu halo futuru sai nabilan liutan maka nia hakarak kontinua nia estudu iha rai laran de’it espesialmente iha Universidade Nasionál Timor Lorosa’e (UNTL), Fakuldade Direitu.

“Ha’u-nia cita-cita hakarak sai ema ne’ebé susesu ho nia kosar-been rasik primeiru hakarak sai juiz”, subliña membru ativu Parlamentu Foinsa’e périodu 2016-2018 ho nia karater, Sorriso é a manifestação dos labios onde os olhos e os ouvidos tenho encontrado aquele que coracão procura katak hamnasa mdar mak manifestasaun husi ibun, ne’ebé matan no tilun hetan hirak ne’ebé fuan buka.

Razaun, tuir Nyza ne’ebé kreativu mós halo artezenatu, dose ho modelu oi-oin no kulinária, koko atu hetan profisaun ida ne’e tanba hakarak buka atu ema hotu bele moris iha justisa ne’ebé justu.

“Hau hakarak ita hotu moris iha justisa ne’ebé mak justu no moris iha balansu entre ita ho ema seluk katak respeita ema nia direitu tanba ema seluk nia direitu mak ita-nia dever”, konfesa feto Baukau oan ne’ebé la gosta ema ho karater egoista.

Tan hakarak realiza mehi naruk ne’e, Nyza ne’ebé gosta konsumu ai-fuan sira liu-liu avokate no xoklate ne’e, bainhira maske ho otas sei ki’ik buka aprende liuhusi atividade no organizasaun sosiál no pastorál ne’e.

Ho esforsu ne’ebé la sura kolen, rahun di’ak, tuir nia bele konsege liu iha selesaun atu sai membru Parlamentu Foinsa’e Nasionál (PFN) ho lia anin mai husi nia belun di’ak ida naran bolu Turibia.

“Nia mak ajuda no fó esplikasaun kle’an kona-ba PFN no iha ne’ebá ha’u mós iha entuziasmu makaas no hakarak mós sai hnsan membru PFN ida tanba ne’e ha’u hakbesik aan ba ami-nia suku hodi husu informasaun to’o iha ne’ebá sira hatete katak formuláriu seidauk iha, se iha mak ami kontaktu”, konta tuir Nyza ho otas tinan 18 ne’e.

Nia hatutan tan iha loron 16 juñu 2016 nia konsege foti formuláriu hodi kandidata án no hodi sai eleitu suku nian tanba ne’e nia konsidera katak loron ne’e, loron espesiál tebes ba nia.

“Ha’u riku ho esperiénsia oi-oin bainhira ha’u sai membru PFN ha’’u orgullu tanba PFN eduka ha’u atu sai joven ne’ebé la’ós de’it interese ba nia aan maibé joven ne’ebé iha mós interese ba nia maluk joven sira seluk”, apresia Nyza hodi hakotu.

Jornalista: Rafy Belo

Editora: Rita Almeida

HUSIK IDA HATÁN