Ajuda Umanitária Hosi Xina Hola Parte Kooperasaun Bilaterál

0
94
Prezidente Repúblika, Francisco Guterres Lú Olo vizita pasiente timoroan ne’ebé maka hala’o tratamentu saúde ho gratuita hosi médiku militár Xina. Imajen Mídia Palásiu PR.

DILI (TATOLI)—Prezidente Repúblika, Francisco Guterres Lú Olo no nia espoza Cidalia Guterres, akompaña hosi Xefe Kaza Sivil no Xefe Kaza Militar, hamutuk ho delegasaun Prezidénsia Repúblika, iha Sábadu (16/12) dadér, hala’o vizita ba Ró Ospitál Marítima Xina, ne’ebé oras ne’e hala’o hela tratamentu gratuita ba veteranus, F-FDTL, PNTL no komunidade iha Timor-Leste iha Portu Dili.

Prezensa Xefe Estadu iha ró Ospital Xina ne’e ho objetivu atu hato’o agradesementu ba Governu Xinés ba apoiu umanitáriu ne’ebé maka Governu Xina oferese, liuhusi konsulta saúde gratuita ne’e.

“Ha’u mai para ko’alia ho autoridade Xinés, hodi husik hela liafuan agradesementu ba sira-nia ajuda umanitária ida ne’e,ʺ Prezidente Lú Olo haktuir.

“Ha’u mai atu vizita hodi haree mós ita-nia pasiente sira, ne’ebé maka halo tratamentu, balun veteranu, halo operasaun hasai kilat musan iha sira-nia isin lolon no ita-nia komunidade sira ne’ebé maka halo tratamentu mós ba moras oi-oin,” nia hatutan.

Xefe Estadu akresenta ajuda umanitária ida ne’e hola parte hosi kooperasaun bilaterál entre Governu Xina no Governu Timor-Leste, tanba ne’e nia espera katak iha futuru konsulta gratuita ne’e bele akontese fila fali bainhira Estadu Timor-Leste presiza.

Lú Olo fiar katak Governu Timor-Leste mós sei bele kria kondisaun ida di’ak liutan hodi bele atende pasiente sira ne’ebé sofre moras oi-oin iha Timor-Leste.

Vizita Prezidente Repúblika iha Ró Arca da Paz ne’e, simu hosi Parada Militar Xina, ne’ebé akompaña hosi Komandante Ró Ospitál Militár Almirante Guan Bailin, Embaixadór Xina iha Timor-Leste, Liu Hongyang no adidu Militár Xina iha Timor-Leste. Ró Ospitál Marítima Xina, hahú hala’o ninia operasaun hodi halo tratamentu saúde ba sidadaun Timor-Leste iha 14 Dezembru no sei ramata iha 21 Dezembru.

(Jornalista: Xisto Freitas)

(Editór : Manuel Pinto)

HUSIK IDA HATÁN