28 Dezembru Data Definida UNITAL Graduasaun

0
177

DILI (TATOLI)-Universidade Orientál Timor Lorosa’e (UNITAL) kompostu husi fakuldade hitu ho judisiáriu na’in 641 sei hala’o graduasaun hafoin hetan despaxu husi Ministériu Edukasaun no Kultura (MEK), ohin, tanba kuaze tinan ida resin judisiáriu sira preokupa maka’as tanba hala’o tarde maske sira kumpri ona rekizitu akadémiku sira.

“Graduasaun ne’e iha dia 28 dezembru, semana oin,” informa vise-reitór asuntu akadémiku UNITAL, Eugevio Dias Quintas ba ajénsia TATOLI, iha Kampus UNITAL, Bekora, sesta (22/12).

Nia reforsa: “Ida ne’e klaru ona, depois komisaun mós organiza ona atu halo mobilizasaun para graduasaun, hamutuk seiscentos quarenta e um”.

Vise-reitór Eugevio Dias akresenta despaxu tuun ona ne’e signifika publika ona iha Jornál Repúblika. “Ami hein de’it ba serimónia graduasaun,” nia dehan.

Despaxu MEK nian ne’ebé dispoen hodi UNITAL bele hala’o graduasaun mak despasu nú. 108/GM-MEC/XII/2017, akreditasaun inisiál liuhusi diploma ministeriál nú.03/GM-ME/I/2014.

Tan kumpri ona rekizitu determinadu dispostu iha artigu 7/nú. I, dekretu lei nú.35/2017, 21 novembru.

Graduasaun ba judisiáriu 641 kle’ur, tuir nia, la’ós tanba MEK ka UNITAL maibé ne’e prosesu katak prosesu ida tenke halo verifikasaun, iha padraun ida no buat hotu tenke la’o tuir lei

“Ema hotu bele la satisfaz maibé ida ne’e prosesu ida. Prosesu ikus liu ona mak despaxu tuun ona, públika iha Jornál Repúblika.Prosesu kle’ur oituan, ami husu deskulpa mas universidade ne’e ita nian mas prosesu ida, ita tenke halo tuir, nia realsa.

Vise reitór Eugevio mós informa, sira esforsu hodi tuir regra universidade no MEK nian liu-liu publikasaun iha jornál repúblika, hafoin mak halo graduasaun nune’e labele iha implikasaun ba graduadu sira.

“Públika mak ami wisuda (gradua-red), seidauk publika, la bele wisuda para labele implika fali ba estudante sira-nia diploma,” nia dehan.

Ho nune’e, relasiona nafatin ho preokupasaun judisiáriu eh família sira, dala ida tan nia husu deskulpa no hateten katak universidade privada ne’e ema hotu nian.

“Ami husu deskulpa tanba ida ne’e ema hotu-hotu preokupa mas ita hotu-hotu pasiénsia, para hetan buat ne’ebé di’ak, buat hotu ne’ebé ema presiza. Universidade ne’e ita hotu-hotu nian, kualidade di’ak, iha ita hotu. Kualidade ne’e prosesu ida, kualidade,” nia husu.

Hodi hatutan: “Ami apresia, ministru asina despaxu i ami prepara ba graduasaun,” konklui vise-reitór Eugevio Dias hodi apresia MEK.

Portavóz judisiáriu UNITAL, Nuno da Costa hateten katak molok to’o iha prosesu ida ne’e sira hetan problema tanba konsidera katak estrutura sira la book aan, halo fali atividade seluk nune’e halo sira sai vítima maske estudante sira kumpre sira-nia dever ona.

Maibé, ho esforsu tomak ne’ebé iha konsege resolve duni problema katak 28 dezembru sei graduasaun

Tanba ne’e, nia rekomenda ba instituisaun akadémika ne’e atu iha futuru labele hamosu tan problema ne’ebé identiku ba estudante eh alin sira ne’ebé mai sei mai kontinua sira-nia estudu.

Nune’e mós, karik universidade loke tan buat ruma presiza buka atu kumpri rekizitu sira ne’ebé mak MEK fó sai.

“Ida ne’e mak ha’u-nia preokupasaun no rekomenda labele hamosu tan problema hanesan” rekomenda judisiáriu husi departamentu informátika ne’e.

Entretantu fakuldade hitu ne’eb’e mak nia judisiáriu sira sei hetan graduasaun tuir data ne’ebé define iha despaxu MEK nian mak Fakuldade Direitu, Fakuldade Siénsia Polítika, Fakuldade Ekonomia, Fakuldade Siénsia Téknika.

Tuir mai, Fakuldade Agrikultura, Fakuldade Edukasaun no Fakuldade Siénsia ho Saúde.

Planu figura ne’ebé mak identifikadu iha posibilidade atu halo oradór sapienta ka oradór sientífiku mak eis-prezidente Repúblika, José Ramos Horta. Bainhira iha kestaun ruma mak tenta atu buka fali timoroan sira seluk.

(Jornalista: Rafy Belo)

(Editór : Manuel Pinto)

HUSIK IDA HATÁN