2018 Ospitál Indonézia-Singapura La Simu Pasiente TL

0
192
Ministru Estadu no Ministru Saúde, Rui Maria Araújo, Ministru Planu no Finansa, Rui Gomes no Ministru iha Prezidénsia Konsellu Ministru, Adriano do Nascimento patisipa iha plenáriu rekursu OR.

DILI (TATOLI)-Ministru Estadu no Ministru Saúde, Rui Maria de Araújo informa, Ministériu Saúde (MS) simu ona chamada hosi Ospitál Indonézia no Singapura, informalmente katak bainhira laiha serteza ida ba selu tusan, ospitál sei la simu pasiente foun hahú husi loron 1 Janeiru 2018.

Primeiru-ministru Marí Alkatiri konversa hela ho Ministru Saúde Rui Maria de Araújo hafoin vizita L4. Foto: GPM

“Ospitál lubuk ida liuliu iha Indonézia ho mós iha Singapura informalmente komunika ona ba Ministériu Saúde enkuantu ita laiha serteza ida, gap ne’e ita selu bainhira, sira hatete ona ba Ministériu Saúde katak a partir de dia um Jeneiru sei la simu tan pasiente foun,” Ministru Estadu no Ministru Saúde (MS), Rui Maria Araújo, informa ida ne’e iha plenáriu Parlamentu Nasionál, ohin, Tersa (19/12).

“Ha’u fila uitoan bá kotuk iha tinan 2016, se ita hakarak haree dadus husi tinan tolu ikus nian, totál pasiente ne’ebé transfere ba rai-li’ur hahú husi Janeiru to’o Dezembru 2016 hamutuk 242. Totál orsamentu ne’ebé aloka iha inísiu orsamentu iha 2016 millaun 2.9 no totál gastu ne’ebé selu ospitál sira inklui selu billete aviaun, akomodasaun ba pasiente, alojamentu ho seluk tan hamutuk hotu millaun 4,” Eis Primeiru Ministru ne’e fó hanoin .

Nia dehan, iha fulan haat ikus, Setembru to’o Dezembru 2016 kuaze millaun 1.7 ne’ebé tenke selu fali ho orsamentu 2017 nian. Tanba ne’e osan ne’ebé aloka ba tinan 2017 balun tenke uza fali ba tinan anteriór tanba normalmente invoice ne’ebé tama iha Setembru mai oin la konsege  atu selu Dezembru tanba liu ona prazu.

Ho ida ne’e mak, iha sétimu governu nian, Ministériu Saúde (MS) hato’o ba deputadu sira katak MS propoin millaun U$5.3 atu selu dívida sira husi Jullu 2017 to’o agora ho razaun balun, iha tinan 2017 totál pasiente ne’ebé transfere bá estranjeiru hahú husi Janeiru to’o Novembru hamutuk 322 nune’e iha aumentu kuaze porsentu 50 husi númeru pasiente ne’ebé transfere bá li’ur.

“Orsamentu ne’ebé ita aloka iha inísiu Orsamentu Jerál Estadu 2017 ne’e millaun 2.3, maibé husi orsamentu ida ne’e millaun 1.7 lori selu 2016 nian signifika restu husi 2.3 pur volta 600 ita lori selu 2017 nian no ita sei konsege selu de’it iha fulan ida ka rua nia laran, iha mós transferénsia husi fundu kontinjénsia iha 2017 nia laran para selu maibé lá konsege,” Rui Araújo esplika.

No reforsa tan katak husi dadus ne’ebé MS iha hahú husi Janeiru to’o Outubru 2017 montante orsamentu ne’ebé presiza selu 322 pasiente ne’ebé haruka ba li’ur besik millaun 8.3. Ho ida ne’e, mak iha défisit ne’ebé presiza atu hatama iha Orsamentu Retifikativu atu rezolve kestaun ida ne’e.

(Jornalista : Maria Auxiliadora)

(Editór : Manuel Pinto)

HUSIK IDA HATÁN