2013-2017 SERVE Rejista Empreza 20.570

0
121
Diretór Ezekutivu SERVE, Florêncio Sanches.

DILI (TATOLI)-Servisu Rejistu no Verifikasaun Emprezariál (SERVE) durante Maiu 2013 to’o Novembru 2017 konsege rejista ona empreza hamutuk 20.570 no tuir baze dadus timoroan mak nafatin domina  iha rejistu komersiál, hatete Diretór Ezekutivu SERVE, Florêncio Sanches.

Tipu empreza ne’ebé rejistada mak hanesan Empreza em Nome Individual (ENIN) hamutuk 9206, Sociedade Unipessal Por Quotas Limitada (Unipessoal, Lda) 7847, Saciedade Por Quotas Limitada (Lda) 3368, Sosiedade Anônima (S.A) 54, Representação Permanente (R.P) 92, no Empresa Pública 3.

“Sertidaun no sertifikadu ne’ebé Estadu ne’e hasai para sira bele ezerse sira-nia atividade ekonómika iha rai ida ne’e hamutuk rihun atus rua liu. Tanba ne’e mak Governu fó fasilidade atu suporta sira hodi bele ezerse sira-nia atividade, to’o ikus sira bele selu taxa ho di’ak”, Florêncio hatete iha Matadouru, ohin.

“Base de dados hatudu katak timoroan mak domina iha rejistu komersiál la’ós ema estranjeiru tanba kompañia estranjeiru lato’o porsentu ida husi 20.000. Agora, ema estranjeiru mak na’in ba kompañia mak hola parte maizumenus 2000 husi 20.000, signifika hola fatin porsentu 10 de’it”.

Florêncio hatutan timoroan ne’ebé rejistu iha SERVE iha 17.000 resin kompara ema rai-liur maibé problema mak maski númeru ne’e boot no iha espíritu negósiu ne’ebé maka’as maibé laiha kapitál, nune’e nia sujere se governu iha polítika ruma atu suporta kapitál ba sira liuhusi dekretu lei entaun bele, tanba ohin loron dekretu lei kona-bá asesu ba finanseira iha tiha ona, maibé só bele implementa iha tinan oin.

Entretantu atu apoia empreza ki’ik no médiu, Sestu Governu aprova ona millaun U$4 maibé seidauk bele ezekuta agora no sei hein fasilidade seluk atubele asegura sira-nia negósiu.

Bainhira hatán kona-ba ema rai-liur mak domina negósiu iha Timor-leste, Florêncio dehan tanba lei sosiedade komersiál mak fó dalan atu ema estranjeiru halo negósiu ki’ik.

“Ema haree ida ne’e ladi’ak, sé ita lakohi ida ne’e bele hadi’a maibé tenke mai ho lei”.

Sobre kompañia internasionál sira ne’ebé iha maioria husi Xina, Indonézia no Korea maibé to’o ohin loron lato’o 100.

(Jornalista : Maria Auxiliadora)

(Editór : Manuel Pinto)

HUSIK IDA HATÁN