DILI, (TATOLI) – Ministru Finansa, Rui Gomes, hateten orsamentu duo desimu sei sufisiente hodi garante funsionamentu makina Estadu bainhira Parlamentu Nasionál la aprova Orsamentu Retifikativu.
ʺFunsionamentu makina Estadu laiha impedementu, osan to’o soke ita labele halo ezersísiu maka’as ba atividade sira ne’eʺ, dehan ba jornalista sira iha uma fukun, ohin.
Bainhira OR la aprova, Governu sei uza orsamentu duo desimu to’o Orsamentu Jerál Estadu foun em vigór.
“Duo desimu ne’e uza to’o orsamentu foun tama iha em vigorʺ, tenik. Maibé, tuir governante ne’e governu sei halo’o ezersísiu maka’as atu orsamentu ne’e bele sufisiente durante fulan hirak nia laran.
Governu sei uza duo desimu hodi selu saláriu funsionáriu, tranferénsia públika no bens no servisu.
Jornalista: Agapito dos Santos
Editora: Rita Almeida
