iklan

NASIONÁL, INTERNASIONÁL, MUNISÍPIU

Maité ho Ferro Lori Timor-Leste Ba Mundu

Maité ho Ferro Lori Timor-Leste Ba Mundu

Maité Monnereau. Foto Tatoli: Egas Cristovão

DILI (TATOLI)–Maité nu’udar sidadaun estranjeiru ho naran kumpleta Maité Monnereau no João Ferro hakarak ema barak liutan iha mundu hatene Timor-Leste, tan ne’e sira hola inisiativa hodi fa’an produtu lokál no orijinál timoroan sira nian hanesan tais, kafé no artezenatu sira.

Vise-ministru obra públika, transporte no telekomunikasaun, Inácio Morreira inagura loja artezanatu, iha aredór aeroportu internasionál Nicolau Lobato, Comoro-Díli, iha fim-de-semana ne’e. Foto Tatoli: Egas Cristovão

“Ema hotu mai hola sasan tradisionál hanesan tais, kaixa, livru hodi ba iha nasaun barak, entaun ema barak hatene kona-ba Timor,” hatan Maité Monnereau ba ajénsia TATOLI, iha loja artezanatu, lokaliza iha aredór aeroportu internasionál Nicolau Lobato, Comoro-Díli, iha fim-de-semana ne’e.

Nia reforsa: “Ne’e mak importante ba ami. Tanba aeroportu, ema barak tama sai, ne’e oportunidade ba timoroan atu mai promove sira-nia produtu”.

Maité akresenta, sira iha inisiativa atu ema hola barak produtu lokál orijinál no artezenatu timoroan sira nian maibé oras ne’e dadaun aviaun seidauk barak hodi halo operasaun.

“Ami hanoin ema barak mai vizita ami-nia loja maibé durante oras rua ka tolu de’it, aviaun tolu ka haat de’it entaun la barak. Maibé ba futuru, se iha aviaun foun, entaun ne’e oportunidade ba ami atu fa’an tan produtu,” nia hateten.

Husu nia hanoin no sentimentu kona-ba fa’an produtu no artezenatu Timor-Leste nian ne’e laran ksolok, Maité hatan badak de’it katak: “Sim”.

Nune’e, informa katak iha janeiru, sei organiza eventu  ida ho sira-nia parseiru serbisu sira, maizmenus ema na’in 70 husi grupu oi-oin iha Timor-Leste tomak hodi promove liutan produtu no artezanatu timoroan sira nian.

“Grupu hitu nolu, grupu Jeitu husi Díli, Projetu Montanha husi Aileu, Kooperativa Laut husi Lospalos, Feto Fitun Fronteira husi Oecuse no seluk tan,” nia informa.

Entretantu, loja artezenatu ne’ebé lokaliza iha aredór aeroportu internasionál Nicolau Lobato ne’e inagura diretamente husi vise-ministru obra públika, transporte no telekomunikasaun, Inácio Morreira.

(Jornalista: Rafy Belo)

(Editór : Manuel Pinto)

iklan
iklan

Leave a Reply

iklan
error: Content is protected !!