iklan

EKONOMIA

Governu Sei Atribui Sertifikadu Investidór Ba Pelikan Paradise

Governu Sei Atribui Sertifikadu Investidór Ba Pelikan Paradise

Dezeñu Konstrusaun Projetu Pelican Paradise iha área Tasi-Tolu. Imajen/Espesiál

DILI, (TATOLI) – Diretór Ezekutivu TradeInvest Timor-Leste, Arcanjo da Silva, hatete tempu badak governu sei atribui sertifikadu investidór ba Pelikan Paradise hafoin halo akordu espesiál hodi hahú investimentu iha Tasi-Tolu.

“Enkontru ohin, Primeiru-Ministru konkorda ona atu atribui sertifikadu investidór ba Pelican Paradise atu halo ninian investimentu iha Tasi-Tolu hafoin halo akordu espesiál no bainhira laiha impedimentu sei marka ba loron 28 Dezembru atu atribui sertifikadu investidór”, tenik ba jornalista sira hafoin enkontru ho Xefe Governu, Marí Alkatiri, iha Palásiu Governu, kinta (14/12).

Pelikan Paradise hahú negosiasaun ho Governu desde 2015 hodi hasai Rezolusaun Governu nú 33/2015 5 Outubru no approva terrenu iha Tasi-Tolu hodi hahú konstrusaun.

Kompañia estranjeira ne’e sei investe ho montante tokon $310 hodi halo otél luxu fitun lima ho kuartu 464, restaurante, apartementu, golf, departementu ho kualidade a’as, sentru komunidade, igreja, muzeum no seluk tan.

Kontratu Pelican Paradise ho Governu iha inisiál ba tinan 50, posibilidade renova ba tinan 50. Sei sai kompañia inan (Mother Company) ba kompañia 20 husi Nasaun Singapura no Malazia ne’ebé sei hamutuk halo projeitu boot ne’ebé sei okupa terrenu ektare 564.

Tuir informasaun, planu Pelikan Paradise ba faze dahuluk atu fó empregu ba timoroan kuaze 1000 no iha faze konstrusaun mós posibilidade iha kampu servisu ba timoroan.

Agora dadaun, kompañia orijen Singapura ne’e iha ona ninia sede iha Timor-Plaza no hala’o ona atividade balun ne’ebé integra mós timoroan.

“Mesmu ita iha situasaun polítika hanesan agora dadaun, maibé prova hatudu katak Pelican Paradise nafatin iha ne’e no  agora iha Timor Plaza, sira disponivel iha loron 28 Dezembru bainhira Primeiru-Ministru asina sertifikadu atu investe no entrega ba sira, signifika katak investidór balun barani atu foti risku no atu hetan oportunidade uluk”, dehan.

Hodi dehan durante ezisténsia TradeInvest, atribui ona sertifikadu ba investidór hamutuk 184, desde 2006 to’o ohin loron ho investimentu boot ho mínimu investimentu tokon $1,5, kuandu investedór estranjeiru no mínimu rihun $50 kuantu investidór nasionál.

“Bainhira Primeiru-Ministru entrega sertifikadu investidór iha Pelican Paradise hanesan sertifikadu dahuluk ba investimentu boot iha setimu Governu”, dehan tan.

Bele haree dezeñu kompletu Pelican Paradise nia iha https://www.pelican-paradise.com/gallery/

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!