DILI, (TATOLI) – Ministériu Edukasaun no Kultura (MEK) ho Embaixada Portugal iha Timor-Leste liuhusi Kooperasaun Portugeza halibur profesór ensinu báziku no sekundáriu sira iha teritóriu hodi halo diskusaun, fahe hanoin, dialógu no aprezentasaun kona-ba implementasaun projetu FORMAR MAIS.
“Projetu FORMAR MAIS moris tanba vontade governu Timor-Leste ho apoiu governu Portugal hodi apoiu ita-nia sistema edukativu iha Timor-Leste liu-liu kona-ba formasaun profesór sira”, Prezidente INFORDEPE, Deolindo da Cruz, informa iha salaun INFORDEPE (Instituto Nacional de Formação de Docentes e Profissionais da Educação) Balide, kuarta (13/11).
Deolindo hatete prosesu implementasaun projetu ne’e hahú 2015 bainhira Konsellu Ministru aprova iha loron 20 marsu 2015.
Aprovasaun ne’e hodi atribui formasaun ba profesór sira konsekuentemente polítika reforsu ba kualidade edukasaun.
Formasaun kontinua importante ba profesór sira, tanba ne’e nesesáriu duni atu halo diskusaun kona-ba prátika pedagójika di’ak sira, impaktu pozitivu sira hodi garante sustentabilidade.
Akresenta, progresu husi diskusaun FORMAR MAIS-Contributo Para a Formação Continua de Professores bele estabele ho di’ak bainhira iha vizaun foun husi interveniente, profesór sira liuhusi kria espasu partilla ideia, diskute papel importante hodi hetan tan ideia foun no dalan foun.
“Nesesáriu atu halibur esforsu sira hodi hadi’a polítika, prinsípiu no prátika edukativa ba dezenvolvimentu edukasaun ida ne’ebé rezolve problema sira ne’ebé mak hale’u ita”, katak Prezidente INFORDEPE.
INFORDEPE nu’udar entidade ba formasaun profesór, assume responsabilidade hodi konsensializar papel edukativu sira, esplika.
Tan liuhusi konsensializasaun, interveniente sira, bele muda mentalidade hodi kontribui ba jerasaun foun sira hodi konsiente no garante liutan prátika di’ak sira.
“Ho propozitu ida ne’e INFORDEPE liuhusi projetu FORMAR MAIS deside realiza semináriu ho tema Contributo Para a Formação Continua de Professores”, dehan.
Ho objetivu fó koñese serbisu sira ne’ebé dezenvolvidu husi profesór sira. Seluk mak hakarak kria espasu reflesaun ne’ebé interveniente sira bele fó sira-nia kontributu hodi fortifika atividade edukativa.
Adida kooperasaun embaixada Portugal iha TL, Daniela Perreira, akresenta Kooperasaun Portugueza kontinua apoiu TL liu-liu ligadu mós ho formasaun kontinua ba profesór sira.
“Relasaun kooperasaun entre Portugal ho Timor-Leste ne’e hahú 1999, tanba relasaun istórika entre nasaun rua. Pursentu 80 kooperasaun ba edukasaun no pursentu 20 ba área seluk. Kooperasaun setór edukasaun ne’e iha nível ensinu oi-oin”, hateten adida ne’e.
Entretantu, profesór portugés ne’ebé hala’o atividade hodi iha projetu FORMAR MAIS hamutuk 27 no destakadu iha munisípiu hotu iha TL.
Profesór 11 destakadu ba ensinu báziku sira no na’in 15 ba ensinu sekundáriu enkuantu ida seluk nu’udar responsável ba projetu ne’e, reprezenta Kooperasaun Portugeza.
Koordenadór projetu FORMAR MAIS, reprezenta TL mak Raimundo Neto.
Durasaun projetu ne’e tinan tolu, hahú 2015 no sei remata iha 2018.
Jornalista: Rafy Belo
Editora: Rita Almeida
