Xanana Sei La Husik Povu Terus

0
588
Kay Rala Xanana Gusmão hafoin enkontru ho lider partidu FRETILIN iha Hotel Novo Turizmu Lecidere, ohin. Foto Tatoli/Antonio Goncalves

DILI (TATOLI) – Deputadu balun iha Parlamentu Nasionál fiar ba líder istóriku no rezisténsia, Kay Rala Xanana Gusmão, tanba sei la husik povu no Nasaun monu ba situasaun ne’ebé mak la di’ak.

“Ha’u fiar maun-boot Xanana hanesan ema ne’ebé mak uluk luta maka’as ba libertasaun rai ida ne’e nian, nia mós sei la husik rai ne’e monu ba situasaun ne’ebé mak ladi’ak”, deklara deputadu hodi bankada Frente Revolusionária Timor-Leste Independente (FRETILIN), Aurélio Freitas, ba jornalista sira iha uma fukun, ohin.

Nia akresenta to’o tempu bainhira lider karismátiku ne’ebé estadu TL fó fiar hodi halo negosiasaun kona-ba delimitasaun fronteira marítima no pipeline greater sunrise, nia misaun hotu sei fila mai, sei tuur hamutuk ho lider partidu polítiku, rezisténsia, istóriku sira liu-liu atu hamutuk oinsá atu solusiona problema polítiku ho di’ak.

“Ha’u fiar metin katak Xanana sei la husik nia povu ne’e terus tan, rai ne’e iha hela problema nia laran, ema hotu preokupa hanesan ne’e, ha’u hanoin ne’e la’ós nia hanoin i sei esforsu maka’as ho tentantiva oi-oin atu solusiona problema ida ne’e iha kualker tempu bainhira nia to’o mai Timor”, akresenta tan.

Reprezentante povu husi partidu FRETILIN, Aurélio Freitas mós apresia ho esforsu Prezidente Repúblika, Francisco Guterres Lú Olo hodi halo dialógu ho líder istóriku no rezisténsia, Marí Alkatiri, Taur Matan Ruak no Kay Rala Xanana Gusmão atu hamutuk hodi solusiona problema ne’ebé mak agora dadauk mosu.

“Kona-ba ita-nia maun-boot Kay Rala Xanana Gusmão ne’ebé mak la marka prezensa, ha’u fiar katak ne’e la’ós nia lakohi maibé serbisu estadu ne’ebé nia asume, nia sei halo iha rai seluk, to’o tempu ida kuandu nia serbisu ne’e remata nia sei mai”, realsa.

Deputadu bankada Kongresu Nasionál Rekonstrusaun Timor (CNRT-sigla portugés), Natalino dos Santos, akresenta lider karismátiku no fundadór partidu CNRT la partisipa iha dialógu ne’ebé promove husi xefe estadu tanba nia hala’o hela misaun hodi luta atu hetan soberania totál ba povu no Timor-Leste.

Natalino garante katak lider istóriku, rezisténsia nomós karismátiku, Kay Rala Xanana Gusmão nunka husik povu no Timor-Leste iha loron ida ka iha minutu ida nia laran tan nia hadomi rai no povu ida ne’e.

Notísia relevante, asesu: http://www.tatoli.tl/2017/11/xanana-nunka-sees/

Jornalista: Rafy Belo

Editora: Rita Almeida

HUSIK IDA HATÁN