Xanana Nunka Sees An

0
204
Prezidente Partidu CNRT, Kay Rala Xanana Gusmão

DILI (TATOLI) –Deputadu Bankada CNRT, Natalino Dos Santos klarifika katak, Prezidente Partidu CNRT, Kay Rala Xanana Gusmão la sees an ba situasaun polítika ne’ebé ohin loron Timor hasoru, maibé Xanana la partisipa diálogu ho Prezidente Repúblika tanba halo servisu iha rai liur.

Deputadu Bankada CNRT, Natalino Dos Santos. Foto/Julia Chatarina

“Ema balun ne’ebé dehan Xanana koko sees-an husi situasaun polítika iha rai laran ne’e la los. Xanana nunka sees husi povu ida ne’e iha situasaun difisil nia laran no situasaun todan tebes mós nunka husik povu no rai ida ne’e,” Natalino dos Santos esplika ba jornalista sira iha Parlamentu Nasionál, Ohin.

Nia dehan, Xanana Gusmão adia diálogu ho Prezidente Repúblika (PR), Francisco Guterres Lú Olo tanba sei halo servisu Estadu iha rai li’ur. Halo servisu Estadu no lori povu Timor nia laran ba defende direitu no fó solusaun ba ita nia futuru, liu-liu ba ita nia oan no bei oan sira para garantidu.

Iha servisu refere, estadu no povu fó konfiansa tomak ba Xanana hanesan xefe negosiadór prinsipál ba fronteira Marítima, tanba ne’e agora nia iha hela rai li’ur lori naran Estadu no povu Timor.

“Hosi partidu Konsellu Polítika Nasionál (CPN) no Konsellu Diretiva Nasionál (CDN) sempre halo kontaktu ho Maun Boot Xanana, nu’udar membru bankada ami so bele ezekuta orden no instrusaun partidu nian,”

Tanba ne’e nia dehan, nu’udar sidadaun iha direitu atu espresa nia hanoin, maibé mós tenke orgullu ho lider hanesan Xanana Gusmão ne’ebé nunka baruk no kolen atu servi ba Timor-Leste.

(Jornalista: Julia Chatarina)

(Editór : Manuel Pinto)

HUSIK IDA HATÁN