WEDO-AEMTL Sei Halo Diálogu Ho Governu Hato’o Difikuldade

0
61
Woman Entrepreneurship Day Organization (WEDO-AEMTL) Associação Empresarial das Mulheres de Timor-Leste. Foto/Facebook Wedo Asia.

DILI (TATOLI)- Woman Entrepreneurship Day Organization (WEDO-AEMTL) Associação Empresarial das Mulheres de Timor-Leste iha loron 18 novembru, aban, sei halo diálogu ho Governu hodi diskute sobre dezafiu asesu ba finanseira no atendimentu públiku ba setór privadu ho burokrasia ne’ebé naruk tebes.

Alende ne’e sei ko’alia mós pagamentu husi Governu ne’ebé dura tempu liu, rai no propriedade ne’ebé seidauk iha lei na’in ba rai nomós oinsá atu dezenvolve agrikultura. Difikuldade sira ne’e identifika liuhusi programa ida hodi halo aprezentasaun durante fulan rua ne’ebé hato’o husi feto maluk sira.

Diálogu ne’e sei halo ho Governu iha ámbitu selebrasaun loron internasionál WEDO nian ba datoluk no iha Timor-Leste ba daruak ne’ebé monu iha 19 novembru ne’ebé país barak festeza kada tinan nu’udar meiu atu apoiu feto empreendedora no emprezáriu nasaun ida-idak nian iha dezenvolvimentu setór emprezariál atu hadi’a ekonomia nasionál hahú husi ida-idak nia uma laran.

WEDO eziste iha Timor-Leste iha tinan 2016 tanba hetan pedidu husi Nasaun Unidu no nomeia Kathleen Tchong Gonçalves hanesan embaixadora WEDO iha rejiaun Ázia no Timor-Leste.

“Espera katak husi diálogu ne’e dezafiu ne’ebé ami identifika, aban ami bele ko’alia, buka dalan oinsá ami bele sai parseiru di’ak ba Governu liuhusi dezenvolve ita-nian ekonómia sustentavel iha rai-laran”, Kathleen hatete iha Mekadu Lama, ohin.

WEDO-AEMTL konvida ministériu relevante hotu atu partisipa iha eventu ne’e atu halo diskusaun hamutuk.

“Kestaun ne’ebé atu halo diálogu ho Governu ne’e la’ós buat foun maibé ami sempre halerik tinan barak ona. Ami husu aban ne’e iha diálogu ida konkretu, sólidu ne’ebé ami ko’alia ami hakarak hetan resposta”.

Emprezária timoroan ne’e hatutan iha ekipa ida ne’e harii atu halo follow up ba problema ne’ebé ko’alia, asegura katak iha duni solusaun ba ida ne’e, nune’e buka dalan atu rezolve asuntu sira ne’e.

Organizaun ne’e nia planu ba futuru mak empreendedorizmu sai hanesan xavi no prioritiza atu hadi’a feto maluk sira-nia jestaun, haforsa, buka oportunidade ba negósiu no nia misaun importante mak hamenus ki’ak no apoiu atividade negósiu feto maluk nian.

(Jornalista : Maria Auxiliadora)

(Editór : Manuel Pinto)

HUSIK IDA HATÁN