UNTL Sei Simu Estudante Foun 3.500

0
172

DILI (TATOLI)-Universidade Nasionál Timor Lorosa’e (UNTL), iha tinan létivu ida ne’e sei simu estudante foun husi ensinu sekundáriu sira hamutuk na’in 3.500.

Dadus informasaun ida ne’e informa husi reitór UNTL, Francisco Miguel Martins hodi responde ba Ajénsia TATOLI kona-ba oinsá posibilidade UNTL sei simu estudante foun iha tinan ne’e, iha Ministériu Finansa (MF), Ai-tarak laran, Díli, kuarta (22/11).

“Sei simu tuir planu estratéjiku, tuir fatin UNTL nian, tuir númeru profesór sira no orsamentu alokadu ba prósimu tinan akadémiku,” akresenta reitór universidade públika únika iha Timor-Leste (TL) ne’e.

Nia hatutan, kona-ba inskrisaun ba estudante foun, Ministériu Edukasaun no Kultura (MEK) mak sei hala’o diretamente hanesan tinan létivu kotuk. “Maibé nu’udar organizasaun konjunta husi ekipa UNTL no Ministériu Edukasaun,” nia dehan.

Reitór Francisco Miguel Martins relata katak iha tinan kotuk UNTL simu estudante foun na’in 4800 maibé tinan ida ne’e tuun.

Razaun, tanba interese ministériu edukasaun nian. Polítika ministériu edukasaun nian iha altura ne’ebá hakarak UNTL sai boot no sai di’ak liu.

“Entaun iha altura ne’ebá Ministériu Edukasaun analiza, númeru seidauk atinji ba universidade boot iha ita-nia nasaun, entaun enkoraja ba aumentu númeru alunu nian ba asesu ensinu superiór, ba UNTL,” hateten reitór UNTL.

Nia hatutan, tinan ida ne’e, sira deside katak estudante na’in 4.800 ne’e númeru ne’ebé demaziadu liu, tuir espasu, tuir orsamentu no tuir númeru profesór sira.

“Entaun, ami agora analiza tuir ita-nia posibilidade, tuir ita-nia realidade katak itatenke simu kada fakuldade, kada departamentu, totál númeru três mil e quinhentos,” nia fó razaun.

Institutu Politékniku Betano (IPB), Same-Maunfahe nian, vise-prezidente administrasaun IPB, Paulino Ribeiro informa katak, tuir planu, IPB sei simu estudante foun na’in 200. “Produsaun animál 100, konstrusaun sívil 100”, informa vise Paulino Ribeiro.

(Jornalista: Rafy Belo)

(Editór : Manuel Pinto)

 

HUSIK IDA HATÁN