UNTL Akolla Estudante husi Japaun

0
62
Foto konjunta entre estudante UNTL ho estudante sira husi Japaun. Foto: Media UNTL

DILI, (TATOLI) – Universidade Nasionál Timor Lorosa’e (UNTL) akolla (simu) estudante universitáriu husi Japaun kompostu Nagasaki University, Hiroshima University no Tokai University, ne’ebé integra iha programa Jenesys (Japan-East Asia Network of Exchange for Estudents and Youths) hodi halo interkámbiu.

Pro-reitór ba Asuntu Kooperasaun Internasionál UNTL, Eduardo Aniceto Serrão, informa atividade ne’e realiza husi JENESYS ho objetivu halo enkontru ema ho ema husi sosiedade Japaun nomós sosiedade husi nasaun seluk inklui Timor-Leste.

“Estudante sira ne’e mai hodi troka koñesimentu, kultura, sosiedade, turizmu ho koñesimentu seluk”, informa Aniceto ba mídia sira iha kampus Liceu UNTL, ohin.

Nia informa, estudante UNTL no Japaun sei aprezenta ida-idak nian matéria, inklui troka kultura. “Entaun, momentu ne’e, sira bele aprende ba malu”.

Eduardo Aniceto dehan universidade nu’udar fatin forma ema, joven sira iha ensinu elevadu. Entaun, atu forma presiza oportunidade oi-oin.

“Se ita uza de’it klase, uza de’it prátika, ida ne’e la to’o”, salienta. Presiza koopera ho instituisaun, universidade no organizasaun superiór sira barak iha mundu, nune’e sai nu’udar oportunidade hodi aprende.

“Aora mundu globalizadu, ita hakarak ita-nia estudante sira mós tama iha mundu globalizadu ne’e”, nia fó razaun.

Diretór ezekutivu, JICA (Japan International Cooperation Agency) Hiroshi Kawagoe, ba ajénsia Tatoli katak estudante japones sira hakarak introduz kultura no istória japaun nian. Nune’e mós, hakarak hatene Timor-Leste liuhusi atividade interkámbiu.

Entretantu estudante husi nasaun ne’ebé koñesidu nu’udar “Samurai” ne’e sei hela iha Timor durante semana ida. Grupu ne’e to’o iha segunda semana ne’e no sei fila hikas ba Japaun segunda, semana oin.

Estudante na’in 19 ne’e kompostu husi Hirosima University na’in neen, Nagasaki University na’in hitu no husi Tokai University, na’in neen.

Programa JENESYS nu’udar projetu ne’ebé avansa husi governu Japaun hodi hametin solidariedade entre nasaun ázia liuhusi interkámbiu ho eskala boot.

Jornalista: Rafy Belo

Editora: Rita Almeida

HUSIK IDA HATÁN