TrandeInvest Halibur Investidór Potensiál

0
109
Primeiru-Ministru, Marí Alkatiri diskursu iha konferénsia internasionál daruak ba investimentu nian ne'ebé organiza husi TradeInvest Timor-Leste iha Timor Plaza.

DILI (TATOLI)-TrandeInvest Timor-Leste organiza konferénsia internasionál daruak ba investimentu nian hodi halibur investidór potensiál kuaze 100 ne’ebé mai husi nasaun Austrália, Xina, Singapura Malázia no nasionál.

Diretór Ezekutivu TrandeInvest Timor-Leste, Arcanjo da Silva, hatete iha eventu ne’e mós halibur investidór ne’ebé durante ne’e investe ona iha Timor-Leste hodi bele haree oportunidade negósiu balun, dezafiu ne’ebé hasoru atu diskute hamutuk.

Aleinde ne’e mós iha aprezentasaun husi governante sira relativamente ho poténsia sira liuliu iha setór agrikultura no turizmu.

“Ami husi TradeInvest sei aprezenta lei investimentu foun ne’ebé sei hahú vigora iha tinan 2018 atu investidór sira bele hatene saida mak bele atrai sira atu mai no iha setór oioin ne’ebé ita promove. Ita konsentra liu ba promove agrikultura, turizmu, indústria transformadora maibé sira mós bele investe iha setór infraestrutura”, Arcanjo esplika iha Timor Plaza, ohin.

Liuhusi eventu ne’e TradeInvest sei aprezenta lei atuál investimentu nian númeru 14/2011 ba promosaun investimentu privadu no esportasaun ne’ebé sei to’o de’it iha dezembru 2017 tanba lei ne’e hahú vigora iha tinan 2011 no iha 2017 termina ona nia validade no hahú iha janeiru 2018  sei utiliza fali lei investimentu foun númeru 15, 23 agostu 2017.

“Lei ne’e nia diferensa mak, lei atuál ne’e ita oferese insentivu fiskál, aduaneiru ita temi dehan tax holidays, ita hakerek kedan iha lei investimentu. Agora, lei foun ne’e ita lahakerek ona benefísiu aduaneiru, fiskál no naun fiskál ne’ebé ita oferse ba investidór ne’e, ita tau de’it iha dekretu lei”.

Razaun prinsipál bainhira tau iha lei mak kuandu dinámika dezenvolvimentu ekonóniku muda tenke hein hodi lori lei ne’e ba Parlamentu Nasionál mak halo revizaun.

“Sé ita tau iha dekretu Governu, tinan-tinan se for nesesáriu Governu hateke ba dehan benefísiu ne’e la relevante ona, ita bele reorganiza fali benefísiu ne’ebé ita oferese, ita tau iha dekretu Governu para fasil atu muda”.

Liuhusi konferensia ne’e, investidór sira haree poténsia ne’ebé nasaun ne’e iha, infraestrutura bázika ne’ebé dezenvolve ona hanesan eletrisidade, estrada, ponte, portu no aeroportu ne’ebé iha no sei iha planu atu dezenvolve tinan hira mak bele konklui.

“Tanba investidór ida sé tinan lima mak ita foin konklui portu no estrada ida di’ak, sira bele halo planu negósiu ohin, tinan lima depois mak mai ne’e ladi’ak ba ita. Ita hakarak atrai sira mai ohin ou aban? Tanba ne’e mak ita hakarak halo fórum sira hanesan ne’e para diskute, sira hakarak rona liu ba polítika Governu nian, estratéjia ba dezenvolvimentu infaraestrutura ne’ebé importante”.

Primeiru-Ministru, Marí Alkatiri, hatete konferénsia ne’e atu dada ema mai investe iha Timór tanba  dalabarak ko’alia sobre diversifika ekonomia signifika investe iha turizmu, agrikultura no rekursu minerál seluk para bele hasai  uitoan todan mai ita ba fundu petróleu.

“Ita bele hetan reseita foun. Ne’e ema sira mai tenke iha garantia, garantia ida mak lei mas garantia boot liu mak situasaun polítika. Tanba ne’e mak mai iha ne’e para ita bele fó garantia ruma para sira mós bele mai investe”.

(Jornalista : Maria Auxiliadora)

(Editór : Manuel Pinto)

HUSIK IDA HATÁN