Tinan Ne’e, Dosente UNTL 26 Sei ba Estranjeiru

0
133

DILI (TATOLI)-Universidade Nasionál Timor Lorosa’e (UNTL), sei haruka tan dosente na’in 26 ba estuda iha estranjeiru. Na’in 18 hasai doutoramentu no na’in walu hasai mestradu, tuir ida-idak nia área espesialidade, iha tinan akadémiku ne’e.

Relata reitór UNTL, Francisco Miguel Martins ba media sira, iha Ministériu Finansa (MF), Ai-tarak laran, Díli, kuarta (22/10) bainhira partisipa semináriu kona-ba ensinu superiór no empregu.

“Ami haruka profesór sira barak ba estuda iha rai li’ur, Portugal, Brasil, Austrália, Nova-Zelandia, Indonézia, Japaun atu eleva ninia kualidade, iha formasaun ba nível ne’ebé mak aas liu; programa mestradu no doutoramentu,” hateten reitór hodi informa mós katak oras ne’e dadaun profesór UNTL sira ne’ebé mak estuda iha li’ur, purvolta na’in 150.

Nia mós informa katak oras ne’e dadaun dosente sira ne’ebé hanorin iha UNTL maioria doutoramentu duke mestradu kompara ho antes ne’e.

“Agora mestradu sira, iha ita-nia universidade, iha UNTL purvolta noventa cinco pursentu (95%) mak mestradu no pursentu lima (5%) mak doutoramentu iha ita-nia universidade. Iha doutór na’in 27 husi área oi-oin,” nia informa.

Entretantu, bainhira UNTL harii no hahú funsiona iha 2000, dosente ne’ebé habilitasaun literária, ho nível edukasaun aas liu, mestradu mak primeiru reitór, Miguel Maia no atuál reitór UNTL, Francisco Miguel Martins.

(Jornalista: Rafy Belo)

(Editór : Manuel Pinto)

HUSIK IDA HATÁN