Terus Ne’e Halo Forte La’ós Fraku

0
62
Judisiariu KS sira hasai hamutuk ho profesór sira. Foto: Constância Sofia

DILI, (TATOLI) – Dekanu Fakuldade Siénsia Sosiál (FSS), Eurico Celestino dos Reis de Araújo, enkoraja judisiáriu 39 iha atividade judisiu ba da XVIII iha kampus FSS, Kaikoli, kinta (23/11) katak terus ne’ebé liu ona sei halo sira forte liutan.

“Imi na’in 39 halo hotu buat hirak ne’e. Terus oan ida, matan-been oan ida, dezafiu oan ida, ohin imi forte, ohin imi to’o iha ne’e”, akresenta iha judisiu ho tema: Edukasaun mak Xave ba Dezenvolvimentu.

Dosente ne’e hatutan dezafiu mak bele halo ita sai tasak liutan ka sai adultu. “La iha dezafiu ne’ebé mai hodi hamate, la iha dezafiu ne’ebé mai ultrapasa de’it, ita-nia forsa. Dalaruma ita mak deziste atu ultrapasa dezafiu sira maibé dezafiu sira mai ita tenta ultrapasa, ita sai forte liutan”, enkoraja.

Dekanu ne’e reforsa matan-been ne’ebé monu agradese, tanba halo ita forte liutan, lalika hirus, agradese.

Eurico de Araújo kongratula ba judisiáriu husi departamentu Administrasaun Públika (AP), Dezenvolvimentu Komunitáriu (DK), Polítika Públika (PP), Siénsia Governamentál (SG) no Komunikasaun Sosiál (KS) la inklui Relasaun Internasionál (RI) tanba seidauk iha judisiáriu.

“Hodi fakuldade tomak nia naran fó parabéns ba imi tanba imi-nia persisténsia ohin loron, imi to’o iha ne’e. Pasiénsia, relasaun umana ne’ebé di’ak durante tempu naruk ita hamutuk, ohin imi iha ne’e, la kle’ur tan ami tenke deklara katak imi husik fakuldade”, katak.

Nia mós apela nafatin parte ida husi universidade no fakuldade tanba alumni nomós universidade hein nafatin kontribuisaun.

“Imi mai ho zero, imi sai ho buat ruma. La tomak la kumpletu tanba ami mós la kumpletu. Ne’e duni, buat ne’ebé ami fó ba imi mós la barak”, tenik tan.

Nune’e dekanu FSS ne’e halo analojia katak judisiáriu sira mai nu’udar ai-tomak, agora, la sai meza ka kadeira di’ak ida karik maibé pelumenus ai-kabelak eh ai-loos di’ak ida atu uza iha dezenvolvimentu estadu nian.

“Ami labele halo imi sai meza no kadeira ne’ebé prontu, ida ne’e ami-nia defisiénsia. Mai ita buka hamutuk atu hadi’a. Ami konta nafatin ho imi maske imi remata ona”, fó hanoin.

Hatutan tan: “Uluk imi mai hanesan finalista ensinu sekundáriu ida maibé ohin imi sai ho dignidade ida, personalidade foun hanesan lisensiadu. Momentu ida ne’e, momentu haksolok”.

Bainhira lisenstura iha mós responsabilidade boot ida iha sosiedade nia leet. “Ida ne’e ita tau iha ita-nia ulun, loron ida ne’e loron haksolok maibé ita simu mós responsabilidade ida iha imii-nia kabaas, responsabilidade ida ne’ebé ita tenke hatan ba estadu no povu ida ne’e”, akonsella.

Nune’e mós fó hanoin ba estudante sira ne’ebé sei ativu hela iha universidade  katak esforsu aan no  estuda maka’as aproveita fasilidade no teknolojia ohin loron nian hanesan internete no buka sai di’ak liu, labele kotu estudu iha dalan klaran tan de’it problema ki’ik oan ida.

“Dezafiu ki’ik labele hamate tiha ita-nia hakarak atu estuda, dezafiu sira ita buka ultrapasa.Se lae, buka apoiu kolega, inan-aman buka ultrapasa dezafiu sira. Maibé, dezafiu sira labele boot liu fali ita-nia vontade atu estuda”, fó hanoin tan.

Sujere mós: “Keta haluha tau aas ita-nia dignidade almamater. Tau iha ita-nia kabas, ita-nia fuan no ita-nia neon iha ne’ebé de’it, bainhira de’it ita hela ba, servisu ba. Ida ne’e importante”.

Ikus liu, dekanu ne’e mós ba inan-aman no profesór eh dosente, funsionáriu no elementu universidade nia tomak ba apoiu no kontribuisaun.

Dala ida tan, ba estudante sira katak konvivénsia hanesan profesór, estudante, ema. Relasaun iha ne’e, relasaun profisionál no relasaun umana entre ema ho ema.

Relasaun profisionál, estudante no profesór, trata malu formalmente. Maibé depois aula trata malu ema ba ema nu’udar amigo nu kolega, iha fakuldade nu’udar família.

“Prontu ohin imi na’in 39, ami deside, imi liu ona juízu ne’ebé ami halo prontu, apuradu atu ba graduasaun, merese ona grau akadémiku ne’ebé tuir kursu imi ida-idak halo ba. Ida ne’e mak judisiu”, hakotu.

Reprezentante graduadu, José Francisco Ribeiro, iha biban, agradese ba universidade, fakuldade, inan-aman no komponente tomak iha UNTL (Universidade Nasionál Timor Lorosa’e) tan bele hala’o ona kna’ar ho paisaun no domin boot. Nune’e, maske prosesu naruk, hasoru dezafiu maibé konsege ultrapasa.

“Hanesan graduadu foun, husu atu ita sai eroi foun hodi hahú serbi ba futuru ba dezenvolvimentu rai doben, Timor-Leste”, reprezentante José Francisco hamenu mós ba graduadu sira seluk.

Reprezentante inan-aman, Valentino da Silva Sarmento agradese ba UNTL  tanba bele prepara futuru oan sira nian hodi bele serbi ba sira-nia moris no nasaun.

Ba judisiáriu sira, nia hateten, Timor-Leste (TL) nasaun foun, durante luta prosesu naruk ohin loron TL iha mós sira-nia liman no husu atu tenke kontribui nasaun ida ne’e, atu bele hakmatek hodi fó dezenvolvimentu ba ita-nia rain.

“Edukasaun la’ós remata maibé to’o mate mak para. Ita-boot sira mak xave edukasaun, xave dezenvolvimentu atu la’o ba oin nafatin,” nia fó lia menon hodi sita sub-tema judisiu FSS nian tinan ne’e: “Ami Prontu Atu Servi no Kontribui Ba Timor-Leste”.

Entretantu, sertifikasaun no atribuisaun grau akadémiku lisensiatura iha FSS, Nú.50/FCS/D/XI/2017.

Ofisializa sertifikasaun no atribuisaun grau akadémiku liuhusi despasu dekanu no artigu 59o konstituisaun Repúblika Demokrátika Timor-Leste (RDTL).

Tuir lei baze Ministériu Edukasaun no Kultura (MEK), dekretu lei nú. 16/2010 dia 20 outubru kona-ba estatutu UNTL.

Polítika nasionál edukasaun no kultura, regulamentu akadémiku UNTL, estatutu FSS artigu 5 nú.4 alinea C. nomós ata ofisializasaun UNTL nian.

Enkuantu, tinan ne’e, sei gradua finalista na’in 503; Fakuldade Agrikultura na’in 67, Fakuldade Edukasaun, Arte no Umanidade na’in 159, Fakuldade Siénsia Sosiál na’in 39, Fakuldade Ekonomia no Jestaun na’in 104, Fakuldade Enjeñária na’in 95, Fakuldade Direitu na’in neen no Fakuldade Medisina, Siénsia Saúde na’in 33.

Finalista sira ne’e sei gradua iha, semana oin, kuarta (30/11), hahú husi tuku 08h00-12h00 (Fakuldade Agrikultura, Fakuldade Edukasaun, Arte no Umanidade no Fakuldade Siénsia Sosiál).

Tuir mai, tuku 14h00-16h00 (Fakuldade Ekonomia no Jestaun, Fakuldade Enjeñária, Fakuldade Direitu no Fakuldade Medisina, Siénsia Saúde).

Jornalista: Rafy Belo

Editora: Rita Almeida

HUSIK IDA HATÁN