“Tempu” Rekursu ba Rendimentu

0
52
Ilustrasaun

DILI (TATOLI)-Kandidatu Phd, Udayana, Bali-Indonézia, Carla Alexandra Costa dezafia graduadu DIT (Dili Institute of Tecnology) perante sívita akadémika, inan-aman no família sira atu halo reflesaun kona-ba tempu.

Dala barak ita rona tempu ne´e osan. Ita sente katak tempu ne´e iha valór duni, koko ita hanoin to´ok tempu hira mak ita uza ona iha ita-nia moris loron-loron? no saida mak ita realiza ona?

“Tempu ne´e úniku no sai hanesan rekursu ba rendimentu ne´ebé ita halo no sei labele troka, labele rai no sei labele fila,” Carla Alexandra, kandidatu PhD, , husi DIT, hateten iha nia oratio sapienta  ka diskursu sientífiku ho tema: Jestaun Tempu hodi Hasa´e Dezempeñu Servisu, iha kampus DIT, tersa (29/11).

Nia hatutan, ema hotu moris iha tempu nia laran maibé ita labele kaer no haree. Ita mós sei la hetan tempu ne´ebé ita presiza, tanba tempu ne´e ema ida sei la sosa maske nia iha osan barak.

Jestaun tempu sai hanesan komponente ne´ebé hatuur hodi atinji objetivu serbisu. Prosesu halo dokumentasaun no halo avaliasaun.

Jestaun tempu hanesan abilidade ne´ebé importante no xave atu halo serbisu ho susesu iha organizasaun nomós sai rekursu importante hodi investe no aumenta valór, benefísiu ne´ebé di´ak ba iha organizasaun nia laran.

“Husi esplikasaun ida ne´e fó hanoin mai ita katak jestaun tempu importante tebes ba ema ida-idak nia moris hodi hala´o nia atividade loron-loron nian tuir nia objetivu” nia akresenta.

Akadémiku ne’e esplika, dezenvolvimentu iha mundu rai-klaran liu hela dadaun, husi efeitu rápidu globalizasaun ba situasaun ne´ebé avansadu nune´e lider jestaun kuaze husi mundu tomak haree hetan alternativu ne´ebé di´ak atu hasa´e dezempeñu ba empregadór sira iha organizasaun ida.

Maske ho tempu ne´ebé diferente maibé koko atu dezenvolve no utiliza tempu liuhusi lei no regulamentu hodi forma hahalok empregadór sira iha organizasaun.

“Hanoin hirak ne´ebé ha´u hato´o mai husi perspetiva péritu barak katak iha mundu modernu, globalizasaun ohin loron nian, jestaun tempu sai hanesan rekursu no xave importante ida ba sosiedade no sai hanesan rikusoin organizasaun nian” dehan Carla.

Nia reforsa, iha parte barak ema la uza tempu ho di´ak iha fatin serbisu. Se ema uza tempu ho di´ak mak sei motiva sira hodi serbisu ho efetivu no efisiénsia no produtivu hodi hasa´e kualidade dezempeñu.

Parte ida ne´e fó mós hanoin mai ita oinsá atu utiliza tempu ne´ebé di´ak iha serbisu ka okupasaun seluk.

Ema barak soe ka gasta tempu no ida-idak sei fó razaun ne´ebé oi-oin hodi defende tanbasá mak nia lakon tempu mas importante ita tenke hatene katak tempu ne´e rekursu ida ne´ebé mais klaru.

Jestaun tempu iha kontestu Timor-Leste (TL), jestaun rekursu umanu sai sentru atu oinsá funsionáriu públiku bele produz servisu públiku ho kualidade tanba rekursu umanu TL sai hanesan xave ba nasaun.

Maibé, to´o oras ne´e, públiku sei kestiona nafatin kualidade servisu sei fraku tebes no atendementu husi empregadór seidauk másimu.

Nia konvida ita atu haree ba faktu balun ne´ebé relevante hanesan; faktu primeiru,hanesan nasaun ne´ebé hakat ona ba tinan 15, sai hanesan momentu importante tebes atu dezenvolve ita-nia nasaun. Maibé, ita tenke rekoñese katak seidauk hatudu rezultadu ne´ebé másimu bazea ba jestaun.

Ne´e mai husi fatór la disiplina hodi utiliza tempu serbisu husi empregadór sira, ezemplu prezensa serbisu, pontualidade serbisu, pontualidade empregadór ba iha rejimentu no prosedimentu.

Faktu daruak, delegasaun serbisu ne´ebé laduun klaru halo empregadór sira gasta tempu hodi halo serbisu seluk ne´ebé la tuir prosedimentu no regulamentu tanba ita hatene katak tarefa serbisu no prestasaun serbisu tenke la´o hamutuk no sai fatór prinsipál ba empregadór ida hodi bele atende ejizénsia husi organizasaun nia laran ka  bele responde ba nasaun nia dezenvolvimentu.

Faktu datoluk, implementasaun no orientasaun ba kompeténsia ba serbisu pesoál mak seidauk ekilibru tanba ne´e jestaun ba tempu sai hanesan fatór ne´ebé boot tebes iha organizasaun.

Faktu dahaat, konsiénsia husi empregadór rasik oinsá utiliza nia tempu badak ka naruk ba planu ne´ebé estabelese iha organizasaun nia laran seidauk másimu.

Faktu dalima, serbisu ne´ebé la tuir planu hanesan enkontru ne´ebé barak liu, uza tempu ba telefone no seluk tan.

Faktu sira ne´e hotu lori ita atu haree faktu seluk ne´ebé abordajen liu, hanesan Timor-Leste ne´ebé dezenvolve hela, jestaun tempu sai hanesan xave ba nasaun tanba ne´e liuhusi kna´ar empregadór sira oinsá serbi no tane nasaun.

Tenke hatudu disiplina oinsá atu utiliza tempu serbisu tuir prestasaun no tarefa serbisu ne´ebé sai meta ba dezenvolvimentu ne´e rasik.

Kandidatu Phd, Carla Alexandra realsa katak maske abordajen ne´e sei jéneriku hela no sei presiza tan reflesaun detallu kona-ba jestaun tempu hodi hasa´e dezempeñu liu-liu ba realidade ne´ebé iha Timor-Leste bazea ba públiku kestiona katak kualidade servisu públiku ne´ebé sei fraku iha atendimentu ne´ebé husi empregadór ne´ebé seidauk másimu,  ita bele to´o iha konkluzaun katak abilidade atu jere tempu ne´ebé sai baze dezenvolvimentu ba nasaun.

Jestaun tempu sai hanesan rekursu ne´ebé importante hodi hasa´e dezempeñu serbisu. Tempu sai hanesan problema ba ema hotu liu-liu bainhira atende kona-a serbisu ne´ebé barak no sente katak tempu ne´e la to´o atu serbisu.

Tanba ne´e pesoál ida-idak presiza aprende no prátika atu salva tempu ho di´ak, ho efetivu no efisiénsia hodi bele atinji serbisu hotu ne´ebé planea tiha ona maske problema ne´ebé barak empregadór sira enfrenta.

Sei limita tebes ho tendénsia katak presiza duni tempu hodi bele organiza no utiliza tempu hodi ba hasa´e dezempeñu serbisu.

Dili Institute of Tecnology hanesan organizasaun tau aas mós jestaun tempu hanesan integral husi sívita akadémiku hodi fó mós servisu ka atendimentu ne´ebé di´ak ba estudante sira,” nia konklui.

(Jornalista: Rafy Belo)

(Editór : Manuel Pinto)

HUSIK IDA HATÁN