Taur Lakohi Halo Espekulasaun

0
221
Prezidente Partidu Libertasaun Populár (PLP), Taur Matan Ruak.

DILI (TATOLI)—Prezidente Partidu Libertasaun Popular (PLP), Taur Matan Ruak hateten nia lakohi halo espekulasaun ba buat ne’ebé seidauk akontese liu-liu halo mosaun sensura forsada ba segundu programa ne’ebé Governu atu aprezenta no  eleisaun antisipada akontese ka lae.

“Ita haree to’ok, maibé realidade Orsamentu Retifikativu avansa tiha ona no restu ne’e ita haree tuir mai. Maibé lakohi halo espekulasaun katak iha Janeiru mai ne’e iha solusaun ona tanba sei iha deskusaun maka’as hosi Parlamentu Nasionál ne’ebé nu’udar fórum vokasionadu ba ida ne’e,” Taur hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta, hafoin enkontru ho Prezidente Repúblika, Francisco Guterres Lú Olo.

Karik iha hanoin atu aprezenta koligasaun pré-eleitorál ba Prezidente Repúblika hodi antisipa eleisaun antisipada, nia hatán, desizaun iha Prezidente Repúblika maibé bainhira buat ne’e to’o mai sira sei toma pozisaun.

“Ami nunka ko’alia Prezidente Repúblika tenke entrega ba ami atu forma Governu. Ami hateten de’it katak konsentrasaun agora iha maioria no minoria. Estabilidade governativa ne’e mai hosi estabilidade polítika liu-liu iha maioria parlamentár nia liman. Iha senáriu ida ne’e, ami prontu,” eis líder rezisténsia haklaken.

(Jornalista: Xisto Freitas)

(Editór : Manuel Pinto)

HUSIK IDA HATÁN