TradeInvest Hasoru Malu Ho PM Hodi Hato’o Preokupasaun

0
134
Diretór Ezekutivu TradeInvest Timor-Leste, Arcanjo da Silva ho ninia estrutura hasoru Primeiru-Ministru (PM), Marí Bin Amudi Alkatiri iha Palásiu Governu, ohin, hodi informa serbisu TradeInvest. Foto GPM

DILI, (TATOLI) – Diretór Ezekutivu TradeInvest Timor-Leste, Arcanjo da Silva, hasoru malu ho Primeiru-Ministru (PM), Marí Bin Amudi Alkatiri hodi informa serbisu ne’ebé TradeInvest halo no preokupasaun ne’ebé enfrenta.

“Tanba sua eselénsia mak ami-nia tutela ne’ebé tau matan ba ami-nia serbisu. Preokupasaun kona-ba investimentu balun ne’ebé iha prosesu hela, ne’ebé ami tenke update ba Primeiru-Ministru, tanba presiza hala’o prosesu sira ne’e no apoiu Primeiru-Ministru nia nafatin, fasilita investidór sira no esportadór sira atu mai investe iha ita-nia rai tantu investidór nasionál no rai-liur”, informa Arcanjo ba jornalista sira hafoin hasoru malu ho PM iha Palásiu Governu, ohin.

Arcanjo hatutan proposta investimentu ne’ebé konklui no implementa ona durante tinan 2015 to’o 2017 hamutuk investidór 12 no balun mak sei iha prosesu nia laran.

“Investimentu boot ne’ebé sei iha prosesu nia laran mak fábrika TL Cement ne’ebé lokaliza iha Baukau, ne’e implementa ona mas, iha prosesu balun ne’ebé ita sei presiza apoiu balun husi Primeiru-Ministru nian. Ida fali mak investimentu boot husi Pelican Paradise, lokaliza iha Tasi-Tolu, ida ne’e investimentu boot ne’ebé presiza apoiu atubele konkretiza maibé prosesu lubuk ida tenke hala’o”.

Aleinde ne’e informa mós ba PM tanba iha loron 13 to’o 16 novembru, TradeInvest sei hala’o konferénsia daruak investimentu internasionál iha Timor Plaza ne’ebé sei loke husi PM rasik.

“Entaun ami mai update prosesu preparasaun ba segunda konferénsia investimentu internasionál”. Konferénsia ne’e sei partisipa husi investidór internasionál kuaze 90 no nasionál balun.

“Ida dia 16 ne’e investidór internasionál lubuk ida mak tau naran ona atu bá vizita Rejiaun Espesiál Administrativa Oekusi-Ambeno tanba sira hatudu vontade atu bá investe iha ne’ebá”.

Jornalista: Maria Auxiliadora

Editora: Rita Almeida

HUSIK IDA HATÁN