Situasaun Jerál iha Kovalima Kontroladu

0
66

KOVALIMA, (TATOLI – Komandante Polísia Nasionál Timor-Leste munisípiu Kovalima, Eugenio Pereira, informa situasaun jerál la’o kontroladu tanba seguransa PNTL ho Forsa-Defeza Timor-Leste (F-FDTL) hala’o kna’ar ne’ebé di’ak atu asegura loron proklamasaun independénsia 28 Novembru ba dala 42.

“Abertura ba selebrasaun ne’e hahú ho espozisaun iha loron 24 no hetan seguransa másimu hosi PNTL ho F-FDTL no dadaun ne’e situasaun kontroladu eh laiha buat ruma akontese”, haktuir ba jornalista sira iha fatin serimónia, postu administrativu Suai, domingu, (26/11).

Númeru efetivu hosi membru PNTL hamutuk 500 resin, no ajuda hosi F-FDTL iha ámbitu seguransa ba loron espesiál 28 Novembru.

Alende ne’e, parte seguransa sira hetan tulun hosi servisu investigasaun nasionál, médiku no sira hodi apoiu serimónia to’o remata.

Meiu ne’ebé seguransa sira utiliza hodi asegura situasaun mak pozisiona fatin ne’ebé identifikadu atu fó apoiu seguransa másimu ba povu iha loron pertinente ne’e.

Kona-ba tiru fugete iha serimónia, nia dehan laiha orientasaun ruma atu ema tiru mezmu kompeténsia hosi komisaun organizadora.

“Komandu la autoriza atu ema sunu fugete, kuandu ami hetan sasan ne’e ami foti hafoin halo identifikasaun nia fonte”, afirma nia.

Entretantu, númeru krime ne’ebé a’as liu iha fatin ne’e, hahú hosi janeiru to’o novembru mak kazu agresaun fízika, violénsia doméstika no kazu alfandega hanesan ema tama sai ilegál.

Atu prosesa krime hirak ne’e kompeténsia hosi Ministériu Públiku atu prosesa tuir dalan legál.

Andamentu prosesamentu hosi Ministériu Públiku hafoin bele jere kazu ne’e ba tribunál atu bele julga tuir baze legál.

Jornalista: Zezito Silva

Editora: Rita Almeida

HUSIK IDA HATÁN