Sekretáriu Agrikultura ZEESM Introdús Serbisu ba PM

0
27
Foto hosi sorin karuk Troy Wayne Adams, Aaron Heat, Julio Marçal, Primeiru-Ministru, Dr. Marí Alkatiri no Sekretáriu Rejiaun Agrikultura ZEESM, Regio Salu. Foto/GPM.

DILI, (TATOLI)-  Sekretáriu Rejiaun Agrikultura Zona Espesiál Ekonómiku Merkadu Timor-Leste (ZEESM TL), Regio Salu, introdús prosesu serbisu Autoridade Rejiaun Espesiál Oekusi no ZEESM TL hodi define polítika kona-ba mekanizmu agrikultura atubele garante produsaun aihan, liuliu hare no batar iha nível ida ne’ebé bele sustenta no garante autosufisiensia ai-han nomós bele ba nível komérsiu.

“Oekusi hanesan rejiaun enklave nia tenke opta mós desizaun ida ne’ebé bele hamenus dependénsia husi importasaun ai-han, lasignifika laiha importasaun mai maibé tenke iha alternativu mós”, hatete Regio iha Palásiu Governu, ohin.

Hatutan tan: “Iha tinan 2016 iha interese barak ba autoridade maibé presiza tempu barak atu halo análize. Ami lori parseiru ida husi Austrália ne’ebé espesializadu iha sistema mekanizasaun agrikultura no ami halo introdús uluk, ami sei estuda tan atu halo desizaun hodi bele parseria iha ekipamentu no sistema ne’ebé presiza”.

Materiál sira ne’ebé presiza mak tratór no mákina kuda nian tanba polítika agrikultura iha Oekusi mak sei lahola tratór atu fahe maibé halo sistema brigada no sentru mekanizasaun ne’ebé disponibiliza de’it ekipamentu ne’ebé agrikultór sira hakarak uza.

“Depois ita uza sistema kolaterál, partisipasaun saham, rai ne’e ita-boot sira-nian mas bele uza ekipamentu ne’ebé hala’i tuir padraun ne’ebé ita estabelese”.

Regio hatutan agrikultura ZEESM TL mak agrikultura komersiál ne’ebé reprezenta ona objetivu atu garante seguransa ai-han no autosufisiénsia ba produsaun rejionál.

Hare reprezenta setór kresimentu ekonómiku no leguminozu hanesan batar Ainaru, batar, fore-keli, fore-mungu no setór kresimentu seluk iha Oekusi mak karau.

“Karau barak mak ema fa’an mai Dili no barak mak ema liuhusi jalan tikus pasa ba Indonézia. Hare membramo Oekusi dezde tempu naruk haruka ona mai Dili no ami bele realsa ema barak sempre hato’o mensajen ba Oekusi lori hare membramo”.

Jornalista: Maria Auxiliadora

Editora: Rita Almeida

HUSIK IDA HATÁN