Seguransa Importante Liu Se Hanoin Moderniza Transporte

0
100

DILI (TATOLI)-Vise-ministru Obras Públika no Transporte no Komunikasaun, Inácio Moreira hateten katak transporte públiku hanesan transporte terestre, Marítima no aéreu presiza moderniza maibé importante mak iha seguransa ba iha nia operasaun, inklui kondisaun estrada.

“Ko´alia kona-ba modernizasaun ne´e iha konseitu barak. Ró ne´e mai ho nia kualidade oi-oin, ró mós bele mai ho nia ekipamentu ne´ebé sofistikadu. Maibé no fundo, importante mak seguransa ba operasaun ró nian, hanesan mós transporte aéreu namoos transporte terestre,” governante ne´e esplika ba jornalista sira iha Hotel Timor, Sesta (010/11).

Nia akresenta, defaktu planu ida ne´e, polítika ba modernizasaun enjerál sei halo, to´o tempu, sei moderniza. Timor-Leste transporte Marítima alende dudu daudauk hela, transporte aéreu oras ne´e la´o normál, aeroportu mós halo hela prosesu aprovizionamentu ninian, hein katak bele halo uluk estensaun ba run way (dalan halai nian) depois hetan mós grant (fundu), governu Japaun, ne´ebé sei halo ita-nia terminál ba Aeroportu Prezidente Nicolau Lobato.

Tanba ida ne’e, oras ne´e daudaun enjeñeiru sira halo hela estudu tékniku, hein katak la kle’ur bele finaliza i hahú konstroi ita-nia terminál. “Ita tenke hakat no la´o oituan-oituan,” vise-ministru Inácio informa.

Nia hatutan, ba transporte terestre, ita hotu sente, ita hotu haree, ita-nia kondisaun, atu moderniza, ita tenke duni moderniza maibé importante mak labele halo desizaun polítika ida ne´ebé halo timoroan sira ne´ebé iha vontade investe iha transporte terestre públiku sira hanesan Mikrolete, Taksi Argo no seluk tan sai fali vítima.

Tanba ida ne´e mak presiza kuidadu, presiza halo planu didi´ak oinsá mak bele moderniza. Ohin loron, komesa daudauk ona, iha timoroan ne´ebé investe iha Taksi Argo, ne´e konsidera mós hanesan pasu ida pozitivu tebes tanba fó ona kondisaun liuliu transporte públiku ne´ebé di´ak.

Ba oin tenke duni moderniza ba hotu-hotu  em particular ba iha transporte públiku atu bele prevene engarrafamentu. Ohin loron mikrolete barak liu, karik bele ita bele adopta ho autokarru boot sira ne´e, iha futuru, hodi bele liga kapitál Dili ba Liquiça, kapitál Dili ba Metinaru no sei moderniza mós iha munisípiu.

Maibé buat hirak ne´e hotu,   tenke hadi´a uluk ita-nia estrada, bainhira estrada seidauk di´ak, ita seidauk halo planu didi´ak, seidauk bele halo transporte públiku, privadu no transporte terestre enjerál sai modernizadu liu, tanba estrada importante ba transporte públiku liu-liu transporte terestre.

Relasaun ho ida ne’e Inácio fó hanoin katak, iha programa sétimu governu konstitusionál nian ne´ebé sei aprezenta tan ba iha PN hodi hetan apresiasaun husi reprezenta povu sira, iha programa no informasaun ne´ebé detalla ba polítika modernizasaun transporte.

(Jornalista: Rafy Belo)

(Editór : Manuel Pinto)

HUSIK IDA HATÁN