Reprezentante Fórum Demokrátiku Nasionál Preokupa Situasaun Rai Laran

0
60
Reprezentante Fórum Demokrátiku Nasionál hasai foto hamutuk ho Xefe Estadu Lú Olo hafoin enkontru. Imajen Mídia Palásiu PR.

DILI, (TATOLI) – Reprezentante Fórum Demokrátiku Nasionál, kinta ne’e hasoru malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, hodi hato’o sira-nia preokupasaun relasiona ho situasaun polítika atuál.

Enkontru ne’e, reprezentante hosi partidu polítiku sia hato’o sira-nia preokupasaun atu Xefe Estadu kontinua garante pás no estabilidade.

Reprezentante Fórum Demokrátiku Nasionál bainhira dadalia ho jornalista sira hafoin enkontru ho Prezidente Repúblika. Imajen Mídia Palásiu PR.

Prezidente Partidu Frenti-Mudansa ne’ebé inklui iha Fórum Demokrátiku Nasionál, José Luis Guterres, husu ba Prezidente Repúblika kontinua halo diálogu ho partidu polítiku sira iha Parlamentu Nasionál hodi buka solusaun ba problema polítika ne’ebé sai timoroan tomak nia preokupasaun.

Tuir José Luis situasaun polítika iha rai laran ne’e lori ona impaktu boot ba setór privadu sira, liu-liu hamosu instabilidade sosiál no ekonómika, tanba ne’e nu’udar Prezidente Repúblika presiza foti solusaun polítika ba situasaun agora.

Reprezentante hosi Fórum Demokrátiku Nasionál ne’e mós husu Xefe Estadu nu’udar komandante supremu F-FDTL atu tau matan ba membru governu balun nia deklarasaun ne’ebé la kontribui ba dame no estabilidade.

Biban ne’e, Prezidente Repúblika, Francisco Guterres Lú Olo, apresia preokupasaun hosi Fórum Demokrátiku Nasionál nu’udar forsa morál no polítika ida atu Xefe Estadu bele tetu ho di’ak liu-tan molok foti desizaun.

Lú Olo hateten sei kontinua promove diálogu nu’udar solusaun dahuluk ba situasaun polítika atuál. Maibé bainhira diálogu la funsiona, Prezidente Repúblika sei hala’o nia kompeténsia tuir regra konstitusionál.

Fórum Demokrátiku Nasionál nu’udar aliansa hosi partitu polítika 12 ne’ebé laiha asentu parlamentár ne’ebé sai forsa polítika alternativa hodi defende interese nasionál no la halis ba partidu polítiku sira ne’ebé forma Governu ka opozisaun iha parlamentár.

Aliansa partidu polítiku sira ne’ebé forma Fórum Demokrátiku Nasionál, tuir rezultadu eleisaun Parlamentár 2017 hetan votus hamutuk 62.000.

Jornalista: Xisto Freitas

Editora: Rita Almeida

HUSIK IDA HATÁN