Proposta OR Governu Kahur Sasan

0
205
Deputadu CNRT, Arao Noe

DILI (TATOLI)—Xefe Bankada CNRT, Arão Noel konsidera Proposta Orsamentu Retifikativu, Governu kahur sasán urjénsia tanba prevee mós $ 12 milloens resin ba eleisaun 2017.

“Entaun ami dehan la’ós prioridade urjénsia, se hakarak urjénsia, urjénsia loloos de’it mak ita sita no labele kahur sasán seluk, sá tan iha orsamentu ne’e hateten $12 milloens resin ba eleisaun 2017, enkuantu eleisaun 2017 foin halo iha fulan Jullu,” Arão Noel informa ba jornalista sira Parlamentu Nasionál, Kinta (16/11).

Nia dehan tan pedidu Orsamentu Retifikativu iha asuntu lubuk ida ne’ebé hatudu katak la prienxe kritériu atu bele trata hanesan orsamentu ratifikativu ho karakter urjénsia tanba  la’ós de’it trata asuntu emerjénsia nian maibé kahur ona ho buat ne’ebé liuhosi prosesu normal.

Tanba kahur sasán, Arão dehan, Bankada Aliansa Maioria Parlamentár kontra ho razaun simples ida mak la devia  governu submete Orsamentu retifikativu ba parlamentu iha ona tinan ikus fiskál nian. Tuir los agora tempu atu diskute Orsamentu Jerál Estadu (OJE) 2018 nian, la’ós Orsamentu Retifikativu.

Iha fatin hanesan, Prezidente Bankada Fretilín, Deputadu Francisco Miranda Branco konsidera Bankada Aliansa Maioria Parlamentár (BAMP) nia membru sira iha komisaun C la iha seriedade atu defende povu hanoin de’it mak vota kontra.

“Interese povu mak tenke tau as, situasaun ne’e iha kedan konseitu ida katak sira tenke vota kontra, di’ak eh ladi’ak tenke vota kontra hotu,” Francisco Branco informa.

Nia konsidera partidu ne’ebé konstitui opozisaun laiha seriedade no viola prinsípiu demokrátiku liuhosi votu ne’ebé povu fó atu mai defende povu nia interese no Estadu nia la’ós grupu no partidu nia interese.

Maibé Fretilín nia pozisaun mak sei defende katak governu mak órgaun administradór no jestór Estadu nian, tanba  sira mak koñese liu realidade ne’ebé Estadu hasoru agora, tanba  ne’e sira iha podér tomak atu halo pedidu Orsamentu Retifikativu.

“Iha ezekusaun Orsamentu Jerál Estadu kuandu halo retifikasaun, aktu ida di’ak tanba  hatudu katak administrasaun no jestaun orsamentu la’o di’ak no lei prevee ida ne’e no iha baze legal mak governu aprezenta,”  Branco konklui.

Entretantu iha komisaun C, Pedidu Orsamentu retifikativu la pasa tanba membru komisaun c nain neen mak vota kontra no Nain lima mak afavór 5 no abstensaun 0.

(Jornalista: Julia Chatarina)

(Editór : Manuel Pinto)

HUSIK IDA HATÁN