Promete Hadi’a PNTL, Hafoin Fiskaliza Servisu Polísia

0
244
Komandante Jerál PNTL, Julio Hornay ka’er liman ho membru komisaun B, Ernesto Dudu ne’ebé antes ne’e hanesan eis-gerrilleiru alias FALINTIL

DILI (TATOLI)—Komisaun B Parlamentu Nasionál, trata asuntu seguransa no defeza eh relasaun internasionál, lidera hosi Prezidente Komisaun, Fidelis Magalhães, ohin (Kuarta-red) halo fiskalizasaun ba Kuartél Jerál PNTL hodi rona no haree ho matan, susesu no difikuldade ne’ebé durante ne’e PNTL infrenta, no promete sei hadi’a.

Tuir Komandante Jerál PNTL, Julio Hornay,  aproveita vizita komisaun B nian iha Kuartél, parte PNTL informa mós ba komisaun B kona-ba planu estratéjiku PNTL nian, inklui difikuldade ne’ebé durante ne’e PNTL hasoru.

“Ami hetan konvite hosi Prezidente Komisaun B ne’ebé trata asuntu seguransa & defeza no relasaun internasionál, Fidelis Magalhães atu mai vizita kuartél Polisia Nasionál Timor-Leste (PNTL) hodi rona diretamente kona-ba situasaun rai laran, servisu polisia nian no difikuldade hirak ne’ebé seguransa PNTL durante ne’e hasoru,” Komisáriu Julio Hornay informa ba Jornalista sira hafoin simu delegasaun ho komisaun B PN, iha Kuartél jerál, ohin.

Nia reforsa, difikuldade ne’ebé durante ne’e parte PNTL hasoru mak, transporte, edifísiu kuartél, orsamentu kolokadu ba alimentasaun, fardamentu no seluk tan.

Nune’e nia espera katak ho vizita komisaun B nian, komisaun sei lori informasaun hirak ne’e ba Parlamentu Nasionál  hodi aprezenta kuandu iha diskusaun orsamentu atu bele hadi’a di’ak liu tan instituisaun PNTL.

Iha fatin hanesan, Prezidente Komisaun B, Fidelis Magalhães hateten, prezensa komisaun nian mai Kuartél Jerál PNTL atu buka hatene progresu no dezenvolvimentu instituisaun PNTL nian.

“Atu hatene katak ita mai hosi ne’ebé no atu ba oin oinsá no dezafiu hirak ne’ebé instituisaun PNTL hasoru durante ne’e, entaun ida ne’e kabe ba responsabilidade ami nian no ami sei haree hodi hadi’a di’ak liu tan,” Fidelis dehan tuir.

No rekoñese katak “Komisáriu PNTL ohin halo aprezentasaun kona-ba progresu servisu PNTL alkansa iha tinan hirak nia laran.”

Ho nune’e lori komisaun B nia naran fó parabéns ba servisu seguransa PNTL ne’ebé halo tiha ona no presiza mellora servisu di’ak liu tan.

“Komisaun B hanesan komisaun espesializada ida kuandu aprezentasaun orsamentu ami sei haree oinsá mak atu responde duni nesesidade hirak ne’ebé PNTL hasoru,” Fidelis Promete.

(Jornalista : Zezito Silva).

(Editór : Manuel Pinto)

HUSIK IDA HATÁN