iklan

NASIONÁL, MUNISÍPIU, POLÍTIKA

Proklamasaun Unilateral Loke Dalan Ukun Rasik An

Proklamasaun Unilateral Loke Dalan Ukun Rasik An

Foto Doc

KOVALIMA (TATOLI) –Prezidente da Repúblika, Francisco Guterres Lu Olo konsidera proklamasaun unilateral, 28 Novembru tina hat nulu resin rua liu ba (1975) mak loke dalan ba Timoroan ka’er rasik nia futuru.

“Prosesu ne’ebé hahú hosi loron proklamasaun independénsia iha 28 Novembru 1975 mak loke dalan ba ita kaer rasik ita nia futuru,” Eis Gerrilleiru ne’e realsa ho kapasidade nu’udar xefe do estadu Timor-Leste iha nia diskursu ba aniversáriu proklamasaun independénsia 28 Novembru iha Kovalima, Tersa (28/11).

Nia dehan hahú hosi loron proklamasaun unilateral timoroan sira enfrenta luta naruk, nakonu ho sakrifísiu, maibé ikus mai hetan vitória tanba kapasidade rezisténsia nian.

Rezisténsia sira iha funu nia laran, sai hanesan povu nia tilun no hatene fó liman ba malu iha nivel lideransa tanba ida ne’e Timor ikus mai hetan nia vitória.

“Ita hasoru dezafiu foun  atu harii país dezenvolvidu ho moris di’ak ba Timoroan hotu, ida ne’e presiza unidade,” Lu Olo fó hanoin  tanba u’udar ema nasionalista hakarak garante independénsia no respeita ba dignidade atu halakon kiak no harii Timor-Leste ne’ebé forte liután.

Timoroan ne’e kaer ona uku Lu Olo husu ukun didi’ak, ukun ho onestidade no kompeténsia tuir prinsípiu no valór atu bele hetan solusaun ne’ebé povu presiza. Basa sasukat ida ba independénsia nia susesu mak maturidade polítika ukun-Nain nian. Bainhira la iha maturidade Sei laiha estabilidade, ita sei laiha dezenvolvimentu, enkuantu povu sira hakarak pás no servisu loroloron hodi haforsa estabilidade atu fó dalan ba dezenvolvimentu nasionál.

“Ha’u sauda maluk Suai oan sira ne’ebé aten-brani, espíritu sakrifísiu no domin ba komunidade no nasaun, kontribui makas ba Timor-Leste nia independénsia,” Prezidente RDTL ne’e hato’o.

Hodi haktuir tan, iha aniversáriu proklamasaun independénsia ba dala 42, nasaun tomak fó omenajen espesiál ba espíritu nasionalista Suai-oan sira no hakuak ba memória vítima masakre Setembru negro (1999).

Ho masakre ida ne’e, Suai oan raan fakar ne’e barak, maibé la’ós Suai oan de’it mak, nasionalista hotu mós lutu, tanba ne’e hakarak hato’o sentimentu kondolénsias kle’an no solidariedade ba faluk no oan kiak sira inklui família hotu ne’ebé lakon ona iha akontesimentu Setembru Negro.

“Estadu harii no respeita martir sira nia sakrifísiu, enkuantu hakru’uk nafatin ba memória maluk sira nian hotu ne’ebé fó an ba mate iha Timor-Leste hodi tane ita nia luta ba dignidade no liberdade ba ita nia pátria.” Lo Olo fó hanoin hikas asuwa’in sira nia mate.

Taur Matan Ruak : “Parabéns”

Iha Parte seluk, Eis Prezidente da Repúblika, Taur Matan Ruak liuhosi komunikadu imprensa hato’o parabéns ba povu doben Timoroan hotu ne’ebé mak komemora Timor Leste nia Aniversáriu Proklamasaun Repúblika Demokrátika Timor-Leste nian ba dala -42°, iha munisípiu Kovalima.

“Ita nia onra no hakoruk ba erois Patria sira hotu, iha ne’e ita hakoruk ba ita nia aman saudozu Proklamador Francisco Xavier do Amaral, Nicolau Lobato, Dr. Mari Alkatiri, Dr . Jose Ramos Horta no membrus Comite Central Fretilín (CCF) hotu ne’ebé aten brani foti desizaun Proklama ita nia Independénsia iha momentu difisil ne’ebá.” Taur Presta omenajen.

No kontinua fó  Viva ba RDTL, Viva povu Timor-Leste, viva proklamasaun Repúblika Demokrátiku Timor-Leste (RDTL) 28 Novembru 1975  no 28 Novembru 2017.

TEXTO DA PROCLAMAÇÃO DA INDEPENDÊNCIA DE TIMOR LESTE 1975

“Encarnando a espiração suprema do povo de Timor Leste e para salvaguarda dos seus mais legítimos direitos e interesses como Nação Soberana, o Comité Central da FRENTE REVOLUCIONÁRIA DE TIMOR LESTE INDEPENDENTEFRETILIN – decreta e eu proclamo, unilateralmente, a Independência de Timor Leste que passa a ser, a partir das 00H00 de hoje, a República Democrática de Timor-Leste, anti-colonialista e anti- imperialista.

Viva a República Democrática de Timor Leste ! Viva o Povo de Timor Leste Livre e Independente ! Viva a FRETILIN !”

Istória Timor-Leste, Timor Portugés

Parte Osidentál ka loromonu illa Timór, ho kapitál iha Kupang, pertense ba Repúblika Indonézia. Parte orientál ka lorosa’e, ho kapitál iha Díli, uluk pertense ba Portugál hahú husi sékulu XVI. Bainhira primeirus merkadores ka ema fa’an sasán sira ho misionárius portugezes tama iha rai Timór iha 1515, sira hetan populasaun tomak organizadus tiha ona iha Estadus kiik lubun ida, ne’ebé fahe ba konfederasaun boot rua: Serviaun ho Belus, ne’ebé sei animistas. Izlamizmu, relijiaun ne’ebé boot liu iha Indonézia to’o oihin loron, seidauk mai to’o Timór, nune’e mós ho budizmu ne’ebé, liu-liu iha Sék.VIII, tau tiha ona nia marka iha Java.

Iha 3º kuartél (períodu tinan 25 ) sékulu XVI to’o iha Timór primeirus frades dominikanus portugezes, liuhusi sira maka komesa dezenvolve neineik influênsia relijiaun, no mós harí dominasaun portugeza. Maibé evolusaun kulturál la’o kontráriu fali, la hanesan ho buat ne’ebé ita haré iha ilhas sira ne’ebé halo parte Indonézia hanesan Java, Sumatra no iha kostas ka parte tasi ninin Kalimantan no Sulawesi, ne’ebé estende ka habelar ba beibeik.

Iha 1651, olandezes sira konkista ka hadau Kupang, iha illa Timór nia parte loromonu rohan bá, no hahú penetra ka tama mai to’o iha rai klaran. Iha 1859, liuhusi tratadu ida ne’ebé Portugál ho Olanda halo, sira konsege tau fronteira entre Timór Portugêz (atuál Timór Leste) no Timór Olandêz (Timór Osidentál/Timur Barat). Iha 1945 Indonézia hetan nia independênsia, no Timór Osidentál mós halo parte nia Territóriu.

Timor iha Segunda Guerra Mundiál

Iha Segunda Gerra Mundiál, Forsas Aliadas (australianus ho olandezes), tanba rekonhese pozisaun estratéjika Timór nian, sira mai tau sira nia forsas iha Territóriu tomak no halo funu hasoru forsas Japaun nian. Timór-oan rihun-ba-rihun mak fó an ba mate hodi luta hamutuk ho aliadus sira. Iha 1945, Administrasaun Portugeza restaura ka hamriik ihkas fali iha Timór-Leste.

Diretu ba Autodeterminasaun

Entre 1945 no Junhu 1974, Governu indonézia, tanba obedese ba Direitu Internasionál, deklara iha ONU no mós iha fatin seluseluk katak nia la iha reivindikasoens territoriais nein uitoan kona-ba Timór Orientál (Leste).Hamahon-an ba Rezolusaun 1514 (XV) 14 Dezembru 1960, Nasoens Unidas konsidera Timór-Leste hanesan Terrítóriu ida ke la Autónomu, iha administrasaun portugál nian okos. Husi 1962 to’o 1973, Asembleia Jerál ONU aprova rezolusoens tuituir malu, hodi afirma direitu Timór-Leste nian ba autudeterminasaun, hanesan mós ba kolónias Portugál nian sira seluk iha tempu ne’ebá. Iha Portugál rejime Salazar (i, tuir mai, Marcelo Caetano), lakohi rekonhese direitu ida ne’e, hodi dehan katak Timór Orientál provínsia portugál nian ida hotu hanesan mós provinsias sira seluk iha Portugál Kontinentál laran.

Revolusaun Iha Portugal

Revolusaun 25 Abril 1974, restaura ka harí hikas fali demokrasia iha Portugál, hodi konsagra respeitu ba autudeterminasaun kolónias Portugál nian sira. Tanba ho vizaun atu promove ezersísiu ba direitu ida ne’e, mak iha Dili iha 13 Maiu tinan ida ne’ebá nian, kria Komisaun ba Autudeterminasaun Timór nian. Entaun Governu Portugêz autoriza harí partidus polítikus, hodi nune’e mosu organizasoens partidárias boot tolu iha Timór Leste: UDT (União Demokrátika Timorense), ne’ebé hakarak “Timór atu integra iha komunidade língua Portugeza”; ASDT (Associação Sosiál-Democrata Timórense) ikus mai nakfila ba FRETILIN (Frente Revolucionária de Timór-Leste Independente) , defende direitu ba independênsia; no APODETI (Associação Popular Demokrátika Timórense), ne’ebé hakarak “integrasaun ho autonomia iha komunidade Indonézia”.

Deskolonizasaun Timor

Iha 1975, tanba impériu koloniál portugêz naksobu-rahun, mak aumenta movimentus libertasaun lokais. Iha Maiu 1975, autoridades Lisboa sira lori sira nia Projetu ida mai aprezenta ba prinsipais partidus Timór-nian sira, i rona tiha sira, publika iha 11 Julhu lei ne’ebé prevê nomeasaun Altu Komisáriu portugêz ida, no, iha Outubru tinan ne’e duni, halo eleisaun Asembleia Populár ida atu define nia estatutu polítiku. Diploma ne’e prevê ona períodu tranzisaun ida ba tinan tolu laran.

Hahú fulan Janeiru 1975, hala’o daudaun ona programa lokál kona-ba deskolonizasaun progresiva, liuhusi Reforma Administrativa, ne’ebé lori konsege realiza Eleisoens ba Administrasaun Rejionál Konselhu Lautém. Rezultadus husi konsulta populár ne’ebé halo ba dala uluk hatudu momoos katak APODETI ladún hetan apoiu, ida ne’e hatudu momoos katak, tuir prosesus demokrátikus, Timór-oan sira nunka bele simu integrasaun ba iha paíz vizinhu. Antezde Eleisoens Rejionais hirak ne’e mós klaru tebes ona, ba naran observadór independente ida ne’ebé mai vizita Territóriu ne’e, katak maioria esmagadora Timór-oan rekuza ka hakribi tomak integrasaun iha Indonézia. Diferensas kulturais mak hanesan razaun prinsipál ida hotu ne’ebé halo sira la simu integrasaun.

Proklamasaun Independénsia

Iha 28 Novembru 1975 Fretilin halo proklamasaun unilaterál independênsia, ho primeiru Prezidente Repúblika, mak Xavier do Amaral, i Nicolau Lobato simu kargu hanesan Primeiru Ministru hodi ikus fali mai, sai mós hanesan primeiru líder Rezistênsia Armada. Ho proklamasaun Independênsia gerra sivíl hetok sai maka’as liután.

Indonézia, ho pretextu ka razaun atu proteje nia sidadauns iha Territóriu Timór laran, invade ka tama ho forsa iha parte Leste illa ida ne’e no sarani seluk fali Territóriu ne’e ho naran Timor Timur, sai nia 27a provínsia. Sira simu apoiu subasubar husi Governu norte-amerikanu ne’ebé haré Fretilin hanesan organizasaun ida ho orientasaun marxista.

Rezisténsia Timor nian

Depoisde Indonézia okupa tiha Territóriu ne’e, Rezistênsia Timór-nian mós komesa konsolida neineik, hahú kedas ho lideransa FRETILIN. Atu apoia FALINTIL (Forsas Armadas de Libertação de Timór-Leste), ne’ebé harí iha 20 Agostu 1975, organiza tán Frente Klandestina iha rai laran, Frente Diplomátika, iha rai li’ur. Hafoin ho lideransa Xanana Gusmão komesa implementa Polítika Unidade Nasionál, hodi tau hamutuk esforsus husi setores polítikus Timór-nian tomak no avansa ho despartidarizasaun estruturas Rezistênsia, no transforma CRRN (Conselho Revolucionário de Resistência Nasionál) ba CNRM (Conselhu Nacional de Resistência Maubere), i ikus fali mai ba CNRT (Conselho Nacional de Resistência Timórense), ne’ebé lidera prosesu to’o independênsia Timór-Leste, maibé ho ona auspísius ka patrosíniu Nasoens Unidas nian. (Informasoens seluktán kona-ba Rezistênsia Timór-nian, konsulta Website AMRT nian – Arkivu & Museu Rezistênsia Timorense – amrtimor.org).

Besik 1/3 populasaun Paíz, ka ema liu 250 mil, mak mate iha funu. Governu Indonézia bandu uza lian Portugêz, no mós halo ema ta’uk koalia Subdistritu, liuhusi sensura maka’as ba imprensa no limita tebes observadores internasionais atu tama mai iha territóriu ne’e, to’o Soeharto monu iha 1998.

Konsulta popular

Iha 1996 José Ramos Horta ho bispu Díli, D. Ximenes Belo simu prémiu Nobel ba Páz tanba defende Direitus Umanus no independênsia Timór-Leste. Iha 1998, ho Soeharto monu, depois “milagre ekonómiku indonézia nian” mós besik ona to’o nia fin, B. J. Habibie simu sai prezidente paíz ne’e nian, foin mak konkorda atu hala’o referendu ida ne’ebé populasaun sei vota “sim” karik hakarak nafatin integrasaun iha Indonézia no “não” se hili independênsia. Referendu realiza iha 30/08/1999 i, ho partisipasaun tomak liu 90% iha referendu no 78,5% votus, mak Povu Timór rejeita ka la simu autonomia ne’ebé Indonézia propoin, hakarak hili mak independênsia formál.

Maski nune’e, milisias pró-Indonézia sira atua nafatin iha Territóriu laran tomak, hodi ataka mós sede UNAMET ( observadores Nasoens Unidas nian) no provoka Bispu D. Ximenes Belo sai ba Austrália, Kay Rala Xanana Gusmão simu azilu iha embaixada ingleza iha Jakarta. Milisias anti-independênsia sira sei kontinua oho ema barabarak, simu kilat no kro’at husi membrus ezêrsitu Indonézia, tanba la simu rezultadu referendu.

Intervensaun ONU

Finalmente iha 18 Setembru 1999 kontinjente “capacetes azuis” Nasoens Unidas nian ida haruka mai, hahú ho forsa militár internasionál hamutuk ema na’in 2500, hafoin hasa’e ba 8 mil, inklui australianus, britânikus, fransezes, italianus, malaius, norte-amerikanus, kanadianus no seluktán, aleinde brazileirus no arjentinus. Misaun forsa páz ne’e nian, ne’ebé brazileiru ida naran Sérgio Vieira de Mello mak xefia, mak atu mai dezarma ka hasai tiha milísianus sira nia kilat no tulun prosesu tranzisaun ho rekonstrusaun paíz.

Restaurasaun Independénsia

Iha Portugál ho iha paízes barak ema organiza kampanhas atu bele halibur donativus, ai-hán no livrus. Neineik situasaun bele kontrola fali, dezarma dadaun milisias sira no hahú hadi’a fali uma, eskolas no infra-estruturas seluktán. Xanana Gusmão fila fali mai paíz, nune’e mós ho timór-oan sira seluk iha ezíliu, barak mak ho formasaun universitária. Hala’o eleisoens ba Asembleia Konstituinte ne’ebé mak elabora ka halo Konstituisaun Timór-Leste nian, no komesa vigora iha dia 20 Maiu 2002, wainhira fó ihkas fali soberania paíz nian, i loron ida ne’e duni, asinala ka marka hanesan Loron Restaurasaun Independênsia.

(Jornalista : Zezito Silva)

(Editór : Manuel Pinto)

iklan
iklan

Leave a Reply

iklan
error: Content is protected !!