Programa La Pasa, Governu La Aprezenta OR

0
640
Xefe bankada Partidu Libertasaun Populár (PLP), Fidelis Magalhães

DILI (TATOLI)—Xefe bankada Partidu Libertasaun Populár (PLP), Fidelis Magalhães deklara, kona-ba orsamentu retifikativu (OR) ne’ebé governu konstitusionál da-hitu prepara hodi halo aprezentasaun atu hetan apresiasaun iha PN inklui mós orsamentu atu selu dívida ne’e, la iha dalan enkuantu programa governu la pasa, aprezentasaun orsamentu so programa governu pasa.

“Ne´ebé, atu selu dívida ka la selu dívida ne´e kabe ba iha depois no fim Orsamentu Jerál Estadu ne’ebé sei inklui iha ne´ebá verba alokada atu selu dívida. Maibé, ita mós tenke komprende lai saida mak dívida? Saida mak ita define hanesan dívida? Ne’e mak tenke haree halo didi’ak,” Xefe bankada PLP, Fidelis Magalhães perante profisionál komunikasaun sosiál sira, iha uma fukun Parlamentu Nasionál (PN), Segunda (06/011).

Tuir Fidelis, normal, bainhira governu atu selu dívida tanba tanba iha Orsamentu Jerál Estadu (OJE) inklui mós verba alokada atu selu dívida, se governu iha dívida.

Nia esplika governu da-hitu konstitusionál ne’ebé lidera husi primeiru-ministru, Marí Alkatiri bainhira aprezenta planu tenke tuir lei, tuir konstituisaun.

Iha konstituisaun ezije kondisaun ida katak programa governu ne´e tenke pasa. “Se programa governu liu-liu la pasa dala rua, governu la aprezenta Orsamentu Jerál Estadu, inklui orsamentu retifikativu.

Ho ida ne’e mak, bankada PLP sei afirma bainhira governu dahituk ne’ebé lidera husi koligasaun FRETILIN (Frente Revolucionário Independente de Timor-Leste) no PD (Partidu Demokrátiku) aprezenta tan nia programa ba daruk PLP sei haree programa, sei halo diskusaun, depois sei iha apresiasaun iha Parlamentu, bankada sei hola pozisaun ida, bankada nia pozisaun relasaun ho programa governu sei pronunsia durante, no fim da aprezentasaun programa.

Artigu 108. (Governu nian Programa) 1. Wainhira Governu nomiadu ona, nia sei halo nia programa hodi hatudu nia objetivu no knaar oioin ne’ebé nia hakarak hala’o, medida ne’ebé atu uza no orientasaun polítika prinsipál sira-ne’ebé nia hakarak tuir iha domíniu atividade governu nian. 2. Primeiru-Ministru hato’o programa governu nian ne’ebé Konsellu-Ministru aprova tiha ona ba Parlamentu  Nasionál atu apresia iha prazu la liu loron tolunulu, sura husi loron ne’ebé Governu hahú nia funsaun.

Artigu 109. (Apresiasaun ba Governu nia Programa) 1. Programa Governu nian sei hato’o ba Parlamentu Nasionál atu hetan apresiasaun, no Parlamentu la funsionál karik, tenke konvida ka konvoka sira ba asuntu ida-ne’e. 2. Debate programa Governu nian labele liu loron lima, no to’o remata, grupu ida-idak iha Parlamentu bele husu atu lá simu, eh Governu bele husu votu konfiansa ida. 3. Atu lá simu programa Governu nian, tenke iha apoiu mai husi maioria deputadu husi sira- ne’ebé sei hala’o hela knaar.

Antes ne’e mós bankada CNRT liuhosi nia komunikadu imprensa haktuir katak, la iha dalan atu sétimu governu lideradu hosi Mari Alkatiri atu hatama Orsamentu Retifikavu, tanba estatutu governu atuál nu’udar governu jestaun, tanba ne’e hein Parlamentu Nasionál aprova lai programa governu mak foin governu iha diretu submete orsamentu retifikativu.

Tuir CNRT Governu Jestaun bele utiliza orsamentu jerál estadu tinan 2017 to’o Dezembru karik liu sei bele aplika orsamentu DOU DÉSIMO ba despeza rekorentes ba fulan Janeiru no Fevereiru 2018, se Orsamentu jerál estadu 2018 seidauk iha.

Aleinde ida ne’e, lei orsamentu jestaun finanseira fó dalan atu halo transferénsia entre kategori bens e serviso, kapitál menór, no transferénsia públiku, nune’e la presiza orsamentu retifikativu atu halo ajustamentu, maibé halo transferénsia de’it ba OJE 2017.

Maibé ajustamentu so halo tuir de’it estrutura orsamentu ne’ebé la’o daudaun. La bele introdus fali ba projetu foun ka ministériu foun.

http://www.tatoli.tl/2017/11/governu-sei-submete-ba-pn-iha-segunda-feira/

(Jornalista: Rafy Belo)

(Editór : Manuel Pinto)

HUSIK IDA HATÁN