Prezidente Repúblika Rona Hanoin Hosi Bispu Diozese Tolu

0
74
Líder Igreja Katólika bainhira hasai retratu ho Prezidente Repúblika, Francisco Guterres Lú Olo iha Palásiu Prezidensiál Nicolau Lobato Bairo Pité, ohin. Foto Egas Cristovão

DILI, (TATOLI) – Bispu Diozese Dili, Virgilio da Silva do Carmo, Bispu Diozese Baukau, Don Basilio do Nascimento, no Bispu Diozese Maliana, Norberto do Amaral, ohin hasoru Prezidente Repúblika, Francisco Guterres Lú Olo hodi rona opiniaun kona-ba situasaun rai laran.

Prezidente Repúblika, Francisco Guterres Lú Olo, bainhira hatan ba jornalista sira iha Palásiu Prezidensiál Nicolau Lobato Bairo Pité, ohin. Foto Egas Cristovão

ʺEnkontru ne’e atu hetan opiniaun husi Bispu Dioseze nain tolu ne’e kona-ba situasaun polítika ne’ebé ita nia povu no sarani sira enfrenta, tanba ne’e ha’u haksolok  tebes hodi rona sira nia ideaʺ, dehan Xefe Estadu ba jornalista sira iha Palásiu Prezidensiál Nicolau Lobato Bairo Pité.

Entretantu, Bispo Dioseze Baucau, Don Basilio do Nascimento, hateten enkontru ne’e hodi fó idea balun ba xefe estadu kona-ba sitausaun polítika ne’ebé akontese iha rai laran.

Mesmu nune’e, líder Igreja Katólika ne’e la mensiona klaru hanoin saida maka hato’o ba Prezidente Repúblika.

Bispo Dioseze Baucau, Don Basilio do Nascimento, bainhira hatan ba jornalista sira iha Palásiu Prezidensiál Nicolau Lobato Bairo Pité, ohin. Foto Egas Cristovão

Kona-ba diálogu ne’ebé Prezidente Repúblika organiza hodi buka konsensu entre líder nasionál sira, Bispu Basilio hateten ne’e sinál pozitivu atu rezolve problema.

ʺBainhira iha tempu atu hala’o diálogu ne’e ita hotu basa liman, signifika ema atu túr hamutukʺ, katak tan.

Prezidente Episkopál ne’e husu ba líder sira atu tau interese nasionál boot liu interese pesoál, grupu no partidu.

Amu Bispu Sira Louva Desizaun Prezidente Repúblika

Tuir komunikadu ne’ebé Tatoli simu hosi mídia Palásiu Prezidensiál, katak enkontru ne’e nu’udar inisiativa hosi Xefe Estadu atu rona hanoin sira husi Amu Bispu sira ba situasaun polítika atuál.

Enkontru ne’e, Prezidente Repúblika informa ba Bispu sira kona-ba prosesu formasaun Governu ne’ebé fó kbiit no kompeténsia depois Tribunál Rekursu anunsia rezultadu eleisaun lejislativa.

Hafoin rona, Amu Bispu sira apresia no louva korajen Prezidente Repúblika nia desizaun hodi forma Governu no fó konfiansa nafatin ba Prezidente hodi tau matan no jere situasaun ne’e tuir kompeténsia ne’ebé hatur ona iha Konstitusaun RDTL.

Amu Bispu Dioseze Baukau, Dom Basílio do Nascimento, hateten:  “Iha situasaun polítika agora dadaun halo ita hetan kursu ida aseleradu ba demokrasia. Iha situasaun sira ne’e iha profesores mais brilhante no mos iha estudante mais brilhante.”

Alemde ne’e Dom Norberto do Amaral  no Padre Juvito do Rego hato’o mós katak desizaun hotu ne’ebé Prezidente Repúblika halo sei iha hela koridór konstitusaun, nune’e husu atu kontinua la’o tuir konstitusaun.

Amu Bispu sira fó hanoin ba Xefe oinsá atu ultra-pasa situasaun atuál. Nune’e, Amu Bispu sira hato’o kontestu ne’e husu ba Presidente Repúblika atu foti desizaun ne’ebé tuir Konstitusaun.

Sujere mós uza kompeténsia tomak tuir konstituisaun hodi previlejia nafatin diálogu ho entidade oioin. Tanba tuir Amu Bispu sira, katak diálogu ne’e laiha ida lakon no ida manan, maibé hetan bom sensu nune’e responde interese estadu no nasionál.

Prezidente Repúblika mós rona Bispu sira-nia opiniaun kona-ba espekuladór sira iha merkadu ne’ebé hanoin buka lukru iha oportunidade ne’e hodi faan sasan ho folin aas no fó todan de’it ba povu.

Prezidente-da-Repúblika kontente no apresia tebes tanba bele hasoru Amu Bispu na’in-tolu hodi hatete: “Ha’u agradese no apresia ba disponiblidade Amu Bispu sira hodi mai hamutuk ho ha’u ohin. Ha’u apresia tebes ho hanoin sira ne’ebé mak ohin hato’o iha enkontru ne’e. Los duni, dialogu permanente hodi hetan konsensu ne’e importante duni. Dialogu ne’e fó espasu ba parte hotu atu fó sira-nia hanoin hodi hetan solusaun”.

Hasoru malu ne’e, Francisco Guterres apresia no hahi povu ne’ebé hatudu vontade no kontribusaun ba dame no establidade.

Hatutan tan komunikadu katak Amu Bispu sira laran metin nafatin  ba esforsu no vontade Prezidente Repúblika hodi halibur ukun na’in sira atu buka solusaun ba situasaun polítika hafoin Programa Governu la passa iha Parlamentu Nasionál.

Jornalista: Agapito dos Santos

Editora: Rita Almeida

HUSIK IDA HATÁN