Presepsaun Foinsa’e Kona-ba Orsamentu Retifikativu

0
153
Atividade Parlamentu Nasionál iha semana ne'e. Foto Relasaun Públika PN

DILI (TATOLI)–Na’i ulun ne’ebé ukun rai Timor, tenke tuur hamutuk hodi fó liman ba malu nune’e tau matan ba povu Timor-Leste, se lae dezenvolvimentu hela iha inserteza nia laran.

Lia hirak ne’e hato’o hosi estudante Universidade Orientál Timor Lorosa’e (UNITAL), Julião da Costa de Carvalho bainhira hasoru malu iha Kampus UNITAL, Bekora, Tersa (21/11).

Nia dehan, Aprezentasaun Orsamentu Retifikativu (OR) iha Parlamentu Nasionál (PN) ho karater urjénsia komisaun C (Finansa Públika) rejeitadu tanba opozisaun Aliansa Maioria Parlamentár ne’ebé hanaran an AMP kontra.

Nune’e mós votasaun iha plenária sera que OR ne’e urjente ka lae. AMP kontra nune’e ikus mai OR nia estatutu sai hikas normal no ikus mai Prezidente Parlamentu Nasionál kontinua haruka OR ba komisaun C hodi halo tan pareser nune’e sei debate iha plenária bazeia ba ajenda no rejimentu Parlamentu nasionál nian.

Ho kondisaun hirak ne’e, hanesan estudante nia husu ulun boot sira tuur hamutuk atu buka solusaun ba problema polítika ne’ebé mak iha, basa povu hein dezenvolvimentu hanesan estrada, bee moos, eletrisidade, saúde no edukasaun maibé tanba buat hotu desizaun polítika, ikus mai la iha serteza ba dezenvolvimentu.

“Orsamentu retifikativu ne’e sai hanesan preokupasaun ba ita hotu, tanba ne’e husu ba na’in ulun sira tuur hamutuk fó liman ba malu ho tau-matan povu no rai doben ida ne’e,” Julião da Costa husu.

Hodi dehan, PN hanesan órgaun soberanu ida ne’ebé halibur polítiku sira. Iha PN sempre iha pró no kontra ba desizaun polítiku ruma relasiona ho interese estadu, povu no nasaun.

Importante hanesan povu no sidadaun husu atu kontribui ba prosesu hotu ne’ebé la’o hodi ita-nia lideransa sira halo no foti desizaun ba interese ita hotu nian liu-liu ligadu ho dezenvolvimentu.

Iha fatin hanesan Letícia da Costa Silva, estudante mós reforsa katak, OR ne’e iha ona PN bainhira la pasa ne’e normál tan sei iha orsamentu 2017 nian.

“Ita gasta hotu tiha orsamentu agora, entaun ba loron aban bainrua ita sei la iha tan osan, ne’ebé ita mós presiza poupa,” nia fó hanoin.

No dehan OR la pasa iha PN tanba bankada ida-idak kumpre nia devér polítiku tuir orientasaun no prinsípiu polítika ne’ebé iha hodi serve ba povu no nasaun.

Notísia relevante: http://www.tatoli.tl/2017/11/governu-propoin-atu-selu-tusan/

Seluk, http://www.tatoli.tl/2017/11/dala-ida-tan-ppn-baixa-ba-komisaun-c/

(Jornalista: Rafy Belo)

(Editór : Manuel Pinto)

HUSIK IDA HATÁN