Preparasaun ba Komemorasaun 28 Novembru Atinje Pursentu 90

0
39
Ministru Administrasaun Estatál, Valentim Ximenes.

KOVALIMA, (TATOLI) – Ministru Administrasaun Estatál, Valentim Ximenes, hatete falta loron rua ba komemorasaun tinan 42 Proklamasaun Independénsia RDTL iha Suai, preparasaun atinje ona pursentu 90.

“Ministériu Administrasaun Estatál hanesan komisaun organizadór prinsipál ba eventu ne’e maibé kuandu ba munisípiu sira kada administradór munisipál mak sai uma nain ba eventu ne’e, hamutuk ho komisaun organizadór Ministériu Administrasaun Estatál hodi servisu di’ak liu tan”, informa Valentim Ximenes hanesan mós Prezidente Komisaun Organizadór, ba jornalista sira iha fatin komemorasaun Kampu Ladi Suai, domingu, (26/11).

Hodi dehan tan orsamentu komemorasaun ba tinan ne’e hamutuk US$650 mill ba munisípiu hothotu. “Orsamentu US$ 650 mil husi OJE (Orsamentu Jerál Estadu) 2017 ne’ebé prevista desde ínisiu ne’e”, tenik.

Hatutan tan: “Orsamentu ne’e aloka ba minisípiu hotu-hotu, Suai mak boot liu hamutuk US$ 400 mill tamba nia sentru komemorasaun, distritu seluk fó tuir sira nia postu administrativu, semak postu administrativu barak, nia hetan orsamentu barak liu, ida ne’e proporsionalidade”.

Iha komemorasaun ne’e ministériu seluk mos tuir harame iha espozisaun hodi hatudu sira nia produtu kada ministériu ninian.

Konvidadu ba eventu boot ne’e, governante ne’e informa tan órgaun soberanu haat sei mai partisipa no reprezentante husi nasaun hitu hanesan Kuwait, Singapura, Malázia, Indonézia, Austrália, Portugal no Nova Zelandia sei partisipa.

Jornalista: Julia Chatarina

Editora: Rita Almeida

HUSIK IDA HATÁN