PR Promulga Ona Lei Orgánika VII Governu

0
607
Ministru PCM, Adriano do Nascimento. Foto/Egas Cristovão.

DILI (TATOLI)—Prezidente Repúblika, Francisco Guterres Lu Olo promulga ona dekretu lei no 35/2017 de 21 de Novembru orgánika sétimu (VII) governu no públika ona iha jornál da repúblika ho data Tersa, 21 de Novembru de 2017.

 Ministru Prezidénsia Konsellu Ministru, Adriano Nascimento antes ne’e iha Parlamentu Nasionál dehan, dekretu lei no 35/2017 de 21 de Novembru orgánika sétimu bele tulun ona governu hodi fasilita ba deputadu sira iha debate Orsamentu Retifikativu (Komisaun C sei estuda).

“Iha plenária ezijénsia deputadu/a sira nia, liu-liu konaba kontiúdu no sira mós kestiona konaba dokumentu adisional ne’ebé presiza tau hamutuk iha OR hanesan lei orgánika,” Adriano Nascimento fó sai jornalista sira foin lalais ne’e.

Entretantu deputada husi bankada CNRT, Carmelita Moniz iha nia intervensaun iha plenária hateten OR ne’ebé governu submete ba meza PN, aloka mós osan atu responde estrutura foun husi Governu Konstitusionál VII. Nune’e nia husu “sera que ita bele aprova orsamentu ida ba estrutura foun sein lei orgánika?”

Nia dehan lei orgánika governu nian mak sei define kona-ba kompeténsia, responsabilidade husi ministériu ida-idak hodi transforma ba Program no orsamentu.

Iha parte seluk tuir dokumentu ne’ebé Tatoli asesu hosi Unidade Apoiu Jurídiku Prezidénsia Konsellu Ministru, Lei orgánika ne’ebé Prezidente Repúblika promulga ne’e, define estrutura ezekutivu no distribuisaun kompeténsia husi Ministériu no Sekretária Estadu, inklui mudansa sira konaba estrutura governu anteriór.

Governu atuál mós la uza ona ministru koordenadór sira, tanba atribuisaun kona-ba koordenasaun nian fó fali ba Primeiru-Ministru, hetan apoiu husi ministru foun sira ne’ebé tama iha estrutura Prezidénsia Konsellu Ministru nian.

Baze ba mudansa sira ne’e reflete ba konkretiza ajenda transformasaun nian ne’ebé harii husi Planu Estratéjiku Dezenvolvimentu tinan 2011-2030 no objetivu Dezenvolvimentu Sustentável ho filozofia ida atu garante Estadu no Administrasaun Públika sai efisiente, efikás no orienta ba rezultadu ne’ebé iha kualidade.

(Jornalista: Julia Chatarina)

(Editór : Manuel Pinto)

HUSIK IDA HATÁN