PPN Aniceto Levanta Mosaun Sensura ba PR Lú Olo

0
712

DILI (TATOLI)—Prezidente Parlamentu Nasionál, Aniceto Longuinhos Monteiro levanta situasaun polítika liu-liu bankada opozisaun aprezenta Mosaun Sensura hasoru Governu no prosesu Orsamentu Retifikativu ne´ebé akontese iha Parlamentu Nasionál (PN) ba Prezidente Repúblika (PR), Francisco Guterres Lú Olo.

“Ha´u hato´o ba Prezidente Repúblika situasaun apresiasaun Orsamentu Retifikativu no Mosaun Sensura hasoru Governu ne´ebé aprezenta hosi bankada parlamentár opozisaun iha loron rua liu-ba,” Aniceto hato´o informasaun ne´e ba jornalista sira iha Palásiu Prezidente Nicolau Lobato, Bairru Pité, Dili, kuarta ne´e.

Nia esplika prosesu hosi Orsamentu Retifikativu ne´e sei la´o hela no hein katak iha tempu razoavel bele aprova hosi Parlamentu Nasionál.

Aniceto hatutan, kona-ba Mosaun Sensura, ne´e tanba tuir Konstituisaun implika demisaun ba Governu, entaun bainhira diskuti Mosaun Sensura refere, Parlamentu Nasionál sei halo konsentrasaun tempu ida ho Governu atu deskuti.

“Mosaun Sensura ne´e direitu deputadu sira nian ne´ebé Konstituisaun prevé. Tanba ne´e, dezde deputadu sira aprezenta, klaru tenki iha diskusaun ba ida ne´e. Agora, tempu atu halo diskusaun ne´e maka presiza konserta ho Governu tanba diskusaun ba Mosaun Sensura ne´e hakarak ka lakohi presiza Primeiru Ministru nia prezensa,” nia esklarese.

Nia afirma, kinta aban, nia sei haruka ofisialmente dokumentu Mosaun Sensura ba Sétimu Governu Konstitusionál.

Tuir Konstituisaun Artigu 111 ne´ebé ko´alia kona-ba Mosaun Sensura nian iha aliña 1. ko´alia katak ho inisiativa ¼ deputadu sira ne’ebé sei hala’o hela kna´ar, Parlamentu Nasionál bele halo votu sensura ida ba Estadu, kona-ba nia programa ka buat seluk ne’ebé relevante ba interese nasionál nomósArtigu 112 aliña 4 no 5 ko´alia katak Governu ida demitudu bainhira programa Governu nian dala rua tui-tuir malu la pasa no la hetan aprovasaun votu konfiansa hosi Parlamentu Nasionál.

(Jornalista: Xisto Freitas)

(Editór : Manuel Pinto)

HUSIK IDA HATÁN