PM Fila Hikas Husi Primeira Vizita de Traballu Ba Perth-Austrália

0
218
FOTO Midia PM

DILI (TATOLI)—Primeiru-Ministru, Mari Alkatiri, ohin ho nia delegasaun fila hikas husi Austrália depois de vizita de traballu ne’ebé realiza husi loron 2 to’o loron 5 de Novembru, ba sidade Perth.

Durante loron rua nia laran, Primeiru-Ministru partisipa iha Conferensia Regional Ázia-Pasífico ne’ebé konta mós ho partisipasaun husi Prezidente Alemaña, Primeiru-Ministru Austrália, representantes rejionais barak, no mós kompañia boot tebes husi Alemaña ho Austrália.

Nu’udar oradór principal, hanesan Presidente da Alemaña ho Primeiru-Ministru Austrália, iha abertura Conferensia ne’e, Primeiru-Ministru Mari Alkatiri hato’o kona-bá poténsia mina rai, gas no minerais ne’e be Timor-Leste bele oferese ba investidora internasionais sira iha ninia intervensaun. Primeiru-Ministru mós hatutan kona-ba Timor-Leste nia intensaun atu investe makas iha Turizmu, Agrikultura ho Peska nu’udár poténsia hodi diversifika ita nia ekonomia no lori empregu ho kualidade de vida di’ak ba Timor-Oan sira.

Iha marjen konferénsia ida ne’e nian, Primeiru-Ministru iha mós enkontru bilateral ho Primeiru-Ministru Austrália, Malcolm Turnbull. Iha enkontru ne’e lider nain rua ne’e ko’alia kona-bá situasaun bilateral korrente liuliu sobre dezenvolvimentu positivus iha negosiasaun Marítima no mós ba oferta ró foun rua husi Austrália ba Timor-Leste atu reforsa Timor-Leste nia kapasidade de patrullamentu marítimu, liuliu iha Tasi Mane.

Primeiru-Ministru, Mari Alkatiri, hatete “enkontru ne’e la’o di’ak tebes hanesan sinál de konfiansa foun entre rai rua ne’e depois de ita asina tiha akordu ba rekursus no fronteira Marítima. Primeiru-Ministru Austrália mós kontente ho prosesu maturidade no kontinuasaun polítika Estadu nian ne’ebé sai nu’udar foku ba governu nia programa ba Timor-Leste.”

Primeiru-Ministru mós hala’o enkontru ho representantes kompañia barak entre sira, enkontru ho Woodside ho ConocoPhillips. Iha enkontru rua ne’e, koalia liu kona ba potensiais de investimentu iha Tasi Timor, liuliu, kona-ba industria downstream bainhira ita dezenvolve rekursus iha Greater Sunrise.

“Iha enkontru rua ne‘e ha’u hato’o ba sira ha’u nia konfiansa total ba ita nia xefe negosiador, Xanana Gusmão, ho nia equipa tomak. Asuntu ida ne’e hanesan interese nasionál, ita tende hamutuk. No mós tende hatudu katak, Estadu ne’e prosesu kontínua ida”, dehan Primeiru-Ministru Mari Alkatiri.

“Timor-Leste mos foin aseita oferta ró foun rua husi Austrália. Agora ke ita nia fronteira Marítima boot liu tan, ita tende iha mós kapasidade atu bele defende ita-nia rekursus liuliu, defende hasoru peska illegal iha ita nia tasi”, Primeiru-Ministru hatutan, hafoin ba visita hotu fasilidade ne’ebé daudauk ne’e halo hela ro ne’ebé atu oferese ba Timor-Leste.

Akordu Kooperasaun ida ne’e importante tebes tan ro sira ne’e foun, Austrália mós sei treina ita nia rekursus umanu atu bele hala’o operasaun. Austrália mos kompromete katak durante tinan 30 mai sei hala’o manutensaun kompletu ba ro rua ne’e iha Austrália. Timor-Leste sei responsabilisa deit ba despesas salariu ho kombustivel.

Programa vizita ne’e remata bainhira Primeiru-Ministru hala’o jantár de trabalho ida ho Ministru Finansas, Senadór Mathias Cormann, executivo Kleber, ho TL Cement. Iha jantar sira koalia kona-ba potensia investimentu iha Timor-Leste. Senador Cormann hatudu mos nia interese atu visita Timor-Leste iha tempu badak atu nune bele hare diak liu tan setores no areas nebe governu hanoin atu investe no desenvolve.

Halo parte Primeiru-Ministru nia delegasaun inklui Ministro de Estadu, Ministru de Agrikultura e Pescas, Estanislau da Silva; Ministro de Estadu, Ministru Adjunto do Primeiru-Ministru, Agio Pereira; Embaixador ba Austrália, Abel Guterres; no Chefe de Gabinete/Assessor Diplomatiku, Nelson Santos.

(Jornalista:Zezito Silva).

(Editór : Manuel Pinto).

 

HUSIK IDA HATÁN