Planu MT Koloka Parte Oferta-Prokura

0
46
Ministru Turizmu, Manuel Florêncio Vong. Foto espesiál

DILI (TATOLI)- Ministru Turizmu, Manuel Florêncio de Canossa Vong, informa, VII Governu Konstitusionál liuliu Ministériu Turizmu prepara ona nia planu ne’ebé deskreve programa liu 20 fahe ba parte rua, oferta no prokura.

“Iha parte oferta ita tenke prepara no dezenvolve atrasaun turístika sira, natureza, kultura, istória nó mós ita-nia relijiaun. Seluk mak tenke kria asesibilidade infraestrutura, sé ema laiha asesu, interne mós laiha, website iha mas lakan-moris entaun tenke kria asesibilidade ema-nian ba informasaun,” Manuel informa iha Sentru Konvensaun Dili, ohin.

Alende ne’e tenke kria atividade tanba iha rekursu boot maibé nunka halo entaun presiza atu hala’o, nó mós prepara alojamentu, restaurante, bar no fatin troka osan nian.

“Ita-nia sentru saúde tenke di’ak, ambiente ne’ebé moos entaun kondisaun sira ne’e inter ligadu. Ida seluk mak autoridade lokál sira ne’ebé mak hola parte hanesan stakeholder no envolvimentu komunidade sira. Komponente ne’e tenke sai hanesan kondisaun di’ak ida”.

Esplika tan iha parte prokura nian mak dezenvolve estratéjia sobre marketing, promosaun ida ne’ebé di’ak.

“Konserteza ita presiza dezenvolve pakote viajen ida di’ak. Pakote ne’e atu dezenvolve di’ak bainhira ita hatene saida mak ita atu fa’an, sé ita rasik mós lahatene entaun oinsá, mas ita atu fa’an ne’e produtu saida? Ida fa’an ba merkadu ne’e buat ida ne’ebé prontu tiha ona”.

Tanba ne’e bainhira prontu atu fa’an ne’e presiza prosesu dezenvolvimentu ida integrada, abranjente tanba ne’e mak sei dezenvolve sentru apoiu dezenvolvimentu integrada abranjente (SADIA) iha zona turístiku tolu ne’ebé tuir PEDN 2030 nian mak iha parte orientál, sentrál no osidentál.

“Se sentru turístiku hirak ne’e ita dezenvolve ho estratéjia SADIA nó mós ita-nia modelu dezenvolvimentu baze komunitária ida ne’ebé mak husi bottom up approach, no top down approach hanaran inisiativa turizmu ho benefísiu ba komunidade entaun modelu rua ne’e sei tulun ema”.

Ministru hatutan, Timór iha fatin barak no iha estratéjia nune’e tempu agora atu servisu tanba knaar mak atu serve no dezenvolve setór turizmu ho didi’ak.

(Jornalista : Maria Auxiliadora)

(Editór : Manuel Pinto)

HUSIK IDA HATÁN