OPIC Hakarak Hari Indústria financial Iha TL

0
208
Foto Espesial

DILI (TATOLI) – Ekipa Kompañia Overseas Private Investment Corporation Pte, Ltd (OPIC) husi Estadus Unidus Amérika (EUA) halo vizita kortezia ho Primeiru-Ministru, Mari Alkatiri no hakarak dezenvolve indústria financial iha Timor-Leste.

“Ami oferese ona konseitu ba Primeiru-Ministru atu dezenvolve indústria financial  iha Timor-Leste nu’udar nasaun ne’ebé presiza investimentu financial boot atu dezenvolve nasaun ne’e”, Diretór OPIC, JW Eddi Danar Tjokronegoro informa ba jornalista sira iha Palásiu Governu hafoin halo vizita ba Xefe Governu, Kinta (23/11).

Nia mós informa,  kompañia OPIC harii ona banku iha nasaun barak no iha tempu badak sei harii banku iha Timor-Leste. Alende ne’e nia akresenta sei harii assurance kréditu, asidente, saúde, edukasaun no seluk tan ne’ebé iha relasaun ho misaun nasaun ida ne’ebé atu investe no bele sei fó kréditu ba povu Timor-Leste. Nune’e mós sei sei dezenvolve negósiu financial distritu.

Hodi dehan tan, ohin iha vizita ne’e entrega ona proposta badak konaba saida mak atu investe ba Xefe Governu hodi analiza no iha inísiu Dezembru ekipa kompletu husi Taiwan no EUA sei hamutuk atu mai halo aprezentasaun ne’ebé kompletu liu tan husi konseitu, lisensa no seluk tan atu bele klaru liután.

Iha fatin hanesan Embaixadór, Gregóriu Saldanha ne’ebé akompaña ekipa ne’e hateten Timor-Leste presiza investor para bele dezenvolve nasaun no loke kampu trabalhu ba komunidade.

“Ita kria kondisaun para investór sira bele mai iha ita nia rai hodi dezenvolve bele lao lais no muda ita nia povu nia moris,” Gregóriu Saldanha reforsa tan.

(Jornalista: Julia Chatarina)

(Editór : Manuel Pinto)

HUSIK IDA HATÁN