MKI Aprezenta Poténsia Timor-Leste ba Investidór Sira

0
57

DILI, (TATOLI) – Ministru Komérsiu no Indústria (MKI), António da Conceição, aprezenta oportunidade ne’ebé Timor-Leste iha ba investidór sira mak indústria manufatureira, parke indústriál atu promove, poténsia rai-laran liuliu minerál no Kosta Súl nomós indústria petrolíferu.

“Manufatureira ne’e hanesan fábrika sira ne’ebé mai atu dezenvolve ita-nia agrikultura, indústria pequena eskala, no ida ne’e mak ha’u koko atu dada sira-nia atensaun maibé boot liu ida ne’e mak parke industriál liuliu ida ne’ebé prevé atu dezenvolve besik Portu Tibar nian”, António hatete iha Timor Plaza, ohin.

Portu ne’e hanesan entrada boot ida no presiza dezenvolve parke industriál no sai fatin ida atu halo espozisaun ba produtu no sai fatin ne’ebé bele fó prestasaun servisu atu ema hotu bele loke sira-nia edifísiu hodi bele hala’o serbisu ba komérsiu nian.

“Ha’u ko’alia poténsia rai-laran nian liuliu iha parte minerál nian ne’ebé agora daudaun indústria mineira ita seidauk book buat ida, entaun ita-nia estudu ne’ebé halo ne’e hatudu duni katak Timor-Leste potensiál tebes, kontein rikusoin barak iha rai-okos maibé to’o agora seidauk dezenvolve indústria sira atu halo dezenvolvimentu”.

Ko’alia sobre Kosta Súl nian mak Ministru hatúr oportunidade boot seluk ne’ebé atu integra mak parke industriál para sustenta. Aleinde ne’e dezenvolvimentu ekonómiku, liuliu dezenvolve agrikultura depois halo fali fornesimentu alimentár ba supply base  no indústria ne’ebé Timor-Leste atu halo.

“Ha’u hato’o de’it oportunidade ne’ebé sei iha, karik sira interesadu atu halo sira-nia investimentu”.

Ministru António espór okaziaun ne’e ba investidór internasionál no nasionál sira iha ámbitu konferénsia daruak investimentu nian ne’ebé organiza husi TradeInvest Timor-Leste ne’ebé partisipa husi ema estranjeiru kuaze 100.

Jornalista: Maria Auxiliadora

Editora: Rita Almeida

HUSIK IDA HATÁN