Memória 12 Novembru “La Nahas”

0
141

DILI (TATOLI)—Eis Prezidente da Repúblika, Taur Matan Ruak apela liuhosi nia mensajen ba Loron Masakre 12 Novembru ba-dala 26, ohin (Domingu) katak, Sira nia isin lolon mak lakon, sira nia naran no sira nia memória sei la lakon (la nahas).

Liuhosi komunikadu ne’ebé mak Tatoli asesu, Taur Matan Ruak hakarak fó ba sira hotu ne’ebé iha tempo liu ba fó sira nia dedikasaun, sira nia tempo, sira nia vida tomak ba ita nia nasaun, liu-liu bainhira ita besik daudaun ba Loron 12 Novembru, ba integrante sira 12 Novembru nian ne’ebé sei moris ba sira no sira nia família.

“Ha’u fó saudasaun espesiál ba sira, hateten ba sira katak vale a pena ita batalha iha momentu ne’ebá para buka ita nia Ukun An ba ita nia rain.”

Ba sira ne’ebé mate, ba sira nia família tomak, Taur Matan Ruak, lori nia Partidu (PLP) nia naran, nia família nia naran no nia an rasik fó sentimentu kondolénsias profundu ba sira hotu ba sira ne’ebé lakon i hateten ba sira katak “sira nian isin lolon mak lakon, sira nia naran, sira nia memória lá lakon, tanba ne’e ohin loron ita nafatin tinan-tinan ita relembra sira.”

Tuir Prezidente Partidu Libertasaun Popular ne’e katak, forma di’ak atu onra sakrifísiu joven sira nian maka redefine, haree fila-fali papél saida maka ita tenke halo agora para lori prosesu ida ne’e ba rohan.

“Ita labele kontente de’it ba buat ne’ebé halo tia ona, liu-liu ita konsentra ba saida mak ha’u tenke halo iha ne’e no ba aban bainrua para bele kontribui nafatin ba prosesu dezenvolvimentu ita nia nasaun nian, tanba Ukun An ita hetan ona, moris di’ak seidauk hetan, ne’e ha’u hanoin dalan mesak atu ita onra sira ne’ebé mate ona, sira nian sakrifísiu maka fó ita nian kontribuisaun, ida-ida no ita hotu fó ita nia kontribuisaun ba dezenvolvimentu ita nia nasaun nian i dezenvolvimentu nasaun nian mai husi dezenvolvimentu individual ema ida-ida nian, família nian, grupu nian to nasaun tomak.”

(Ekipa Redasaun)

HUSIK IDA HATÁN