Mehi Presiza ho Esforsu

0
54
Ilustrasaun

DILI (TATOLI)-Susesu iha ita-nia oin. Maibé, bainhira ita nunka esforsu, nunka pasiénsia, nunka halo orasaun mak mehi ne´e sei hanesan mehi iha meudia loron manas. Maibé, bainhira ita mehi akompaña ho esforsu, pasiénsia no halo orasaun, fiar katak Maromak sei loke dalan hodi atinji ita-nia mehi.

Deklarasaun ne´e fó sai husi reprezentante graduadu DIT (Dili Institute of Tecnology), tinan 2017, Sófia Ana Florêncio Lopes perante graduadu na´in 495, inan-aman, sívita akadémika no konvidadu sira durante nia intervensaun, iha graduasaun DIT nian ba da-sia, iha Kampus DIT, Ai-meti Laran, Manleuna-Díli, tersa (29/11).

“Loron ohin la signifika loron ikus mai ita-nia estudu no ita-nia mehi. Maibé, loron inísiu ida mai ita hodi hatudu. Ita remata ona  ita-nia estudu iha primeiru siklu estudu universitáriu, ne´e parte ida husi viajen estudu nian. Espera katak ita hotu sei sai susesu hodi atinji mehi ne´ebé mak ita hakarak,” Sófia Ana Florêncio fó hanoin ba nia maluk graduadu sira.

Nia mós fó mensajen ba graduadu husi School of Engineering and Science, School of Petroleum, School of Business and Management no School of Tourism and Hospitality katak fila ba sosiedade implementa siénsia tuir lema DIT, Matenek Nodi Serbi.

Signifika bainhira aprende siénsia no hetan matenek husi DIT durante tinan haat, lima ka neen fila fali ba sosiedade bele aplika saida mak hetan iha DIT hodi ba serbi família, sosiedade no nasaun.

Hodi serbi, reprezentante graduadu DIT ba graduasaun da-sia, Sófia Ana Florêncio Lopes haktuir, nia sita kuotasaun eis-reitór DIT, Manuel Florêncio Vong, atuál Ministru Turizmu katak: “Serbi la´ós ita sai atan, maibé ita bele iha prinsípiu ida hodi bele iha kompeténsia. Hatudu liuhusi ita-nia koñesimentu, ita-nia abilidade no ita-nia atitude ho konsiénsia, ho paisaun no konsisténsia.

 Ba se de´it mak hakarak serbi nasaun ida ne´e, mai ita serbisu ho onestidu, integridade no disiplina”.

Reprezentante graduadu, Sófia Ana Florêncio, hato´o mós obrigadu wa´in ba inan-aman, dosente eh edukadór sira tan ajuda ona sira durante estudu tomak, iha perkursu husi ensinu báziku to´o gradua iha ensinu superiór.

“La iha liafuan atu hato´o, ami hato´o obrigadu ba parte hotu-hotu ne´ebé ajuda ami  em termo finansiál, materiál no morál hodi bele finaliza duni ami-nia estudu iha nível universitáriu iha grau lisensiatura nian,” nia hato´o.

Nia akresenta, ba graduadu sira katak susesu ne´ebé iha la sees husi esforsu inan-aman, ho esperansa katak ita oan sira sai susesu. Inan-aman nia sakrifísiu tomak ne´ebé halo ba oan sira la iha barometru hodi bele sukat inan-aman nia di´ak, inan-aman nia kolen.

Dala wa´in sira sente kolen maibé sira la dehan kolen. Sira la hatene udan, la hatene loron manas tan de´it buka fundu hodi dudu oan sira ba eskola, husi ensinu báziku to´o iha nível universitáriu.

Graduasaun halo inan-aman orgullu. Tan ne´e, ita nu´udar oan tenke agradese ba inan-aman sira-nia esforsu, kontribuisaun, orasaun no motivasaun. Oan sira selu labele, sira-nia favór.

“Imi mak sai hanesan ami-nia eroi, sai ami-nia inspiradór hodi hahú ami-nia prosesu edukasaun husi nível báziku to´o iha nível universidade ho di´ak tanba ita-boot sira-nia esforsu tomak,” hodi graduadu sira, Sófia hato´o.

Nia mós husu obrigadu ba dosente eh edukadór sira  ta konsidera katak dosente sira fó ona tempu tomak hodi diriji, dedika no transforma sira-nia matenek ba sira. Dosente sira sai hanesan inan-aman segundu iha área eskola ninian.

“Ho ida ne´e, ha´u hakarak hateten em nome estudante graduadu hotu-hotu, ho haraik aan hato´o obrigadu wa´in, tan ho ita-boot sira-nia pasiénsia tomak mak forma ami sai ema edukadu ida,” nia hato´o tan.

Nia reforsa, ba instituisaun, lori nafatin graduadu sira-nia naran hato´o mós obrigadu wa´in tan fornese ona fasilidade no sasan ne´ebé mak  di´ak hodi sira bele utiliza hodi suporta eh apoiu sira-nia estudu durante prosesu aprendizajen tomak hodi bele hetan siénsia no koñesimentu no abilidade estudu.

“Ami-nia esperansa katak almamater Dili Institute of Tecnology bele sai hanesan kampu eselénsia iha Timor-Leste no sai hanesan fatin ida hodi produz rekursu umanu ho kualidade atu bele garante ba dezenvolvimentu nasaun nian,” espera reprezentante ne´e.

Nia mós hato´o deskulpa ba inan-aman, dosente eh edukadór inklui komponente tomak ne´ebé apoiu no fasilita ona sira-nia estudu ba aktu ne´ebé sira komete, karik la rona, la halo tuir hakarak eh kontra ho nune´e ho haraik aan nia husu perdua.

Reprezentante graduadu DIT tinan 2017 Sófia Florêncio Lopes haklaken, relembra hikas loron dahuluk to´o estudu remata iha ensinu superiór ne´e, la´ós aprende buat formál de´it maibé aprende mós oinsa moris iha sosiedade nomós aprende buat barak ne´ebé fó vantajen.

Aprende oinsa halo sakrifísiu, aprende sai ema ne´ebé pasiénsia tanba iha prosesu aprendizajen nia laran, iha buat ne´ebé di´ak no iha buat ne´ebé aat.

“Buat ne´ebé di´ak halo ita kontente, buat ne´ebé aat halo ita triste maibé ida ne´e halo ita aprende di´ak liutan. Buat hirak ne´ebé ita halo, ita konsiente katak prosesu atu produz rekursu umanu la´ós buat ne´ebé fásil. Produz rekursu umanu ne´ebé kualidade liuhusi étapa ida ba étapa ida atu bele sai ema ne´ebé intelektuál,” nia hanoin hikas.

Prezidente BoT (Board of Trust) DIT, Estanislau Saldanha iha nia intervensaun fó hanoin ba graduadu 495 DIT nian katak buat sira ne´ebé graduadu sira ne´e hetan ona iha DIT la´ós buat hotu-hotu, maibé hanesan primeiru “bukae” atu tama ba iha sosiedade.

“Ita-boot sira-nia kursu hotu ona iha DIT. Maibé, ita-boot sira-nia kursu, eskola sei nafatin iha tempu tomak,” nia akonsella.

Saldanha mós promete katak DIT sei kontinua apoiu nia graduadu sira bainhira hasoru susar iha sosiedade nia laran.

Board kontinua tulun, Konsellu Ezekutivu DIT kontinua halo oinsá mak ita-boot sira halo nusa mak fortifika kualidade ensinu iha DIT, atu nune´e bele serve di´ak liu ba iha ita-nia komunidade, ba ita-nia povu no ba ita-nia nasaun,” nia apela.

(Jornalista: Rafy Belo)

(Editór : Manuel Pinto)

HUSIK IDA HATÁN