MAE Prefere Promove Artista Timoroan

0
66
Ilustrasaun

DILI, (TATOLI) – Ministériu Administrasaun Estatál (MAE) gosta promove artista timoroan sira liuhusi eventu importante sira, nune’e bele promove kultura no identidade.

“Artista li’ur ba tinan ida ne’e ba Suai la iha, hanesan timoroan ha’u hakarak fó tempu ba timoroan, promove ita-nia kultura rasik, ita-nia múzika rasik”, ministru administrasaun estatál, Valentim Ximenes, dehan perante profisionál komunikasaun sosiál sira iha Palásiu Governu, segunda (20/11).

Timor-Leste mós iha artista barak, balun juniór no seniór. Bele konvida sira kanta iha eventu importante sira, tan sira mós kuaze mesak artista didi’ak.

“Ha’u gosta liu haree timoroan kanta ninia múzika rasik iha ita-nia eventu, ne’e promove ita-nia kultura, ita-nia identidade rasik, ita labele fó fali fatin ba ema tomak, ema li’ur”, esplika governante ne’e.

Valentim mós dehan maske nia gosta múzika husi rai li’ur maibé prefere rona hananu timoroan sira nian ne’ebé artista timoroan sira rasik mak kanta. “Ne’e mak ha’u hakarak i ita sei garante ida ne’e”, garante.

Entretantu, to’o ohin loron seidauk iha lei ruma ne’ebé espesífiku hodi regula no tau-matan ba artista timoroan sira, liu-liu evita múzika plajiada sira.

Seluk, artista timoroan sira mós to’o ohin loron, kuaze halibur no hamahan aan iha ALMAMOR (Associação de Músicos de Timor-Leste) no nia sekretáriu jerál mak artista no múziku, Nelson Turquel.

Jornalista: Rafy Belo

Editora: Rita Almeida

HUSIK IDA HATÁN