Lu Olo Husu Povu Kovalima Garante Estabilidade

0
68
Prezidente da Repúblika, Francisco Guterres Lú Olo.

KOVALIMA (TATOLI)– Prezidente Repúblika Demokrátika Timor-Leste (PR-RDTL), Francisco Guterres Lu-Olo apela ba povu Timor-Leste liuliu komunidade Kovalima atu kria estabilidade iha rai laran relasiona ho situasaun polítika atuál.

“Sei la iha buat ida akontese, hateten ba oan sira, alin sira no joven sira hosi partidu ne’ebé de’it katak daudaun ne’e to’o tempu ona ita atu hamutuk, la’ós ódiu vingansa,” Xefe Estadu Lu Olo hato’o ba komunidade sira iha Kovalima iha ámbitu diálogu ohin, Segunda (27/11).

Nia afirma, povu nia devér mak tuir ona votasaun, situasaun polítika ne’e, ba husik ba nai ulun sira nia responsabilidade, nai ulun sira mak bele rezolve maibé povu iha kraik tenke hakmatek no hakuak ba malu.

Atu partidu A eh B  no seluk tan lalika sadik malu, tolok malu hanesan iha facebook tanba atitude hanesan ne’e la di’ak.

Ba komunidade ne’ebé mak hela iha foho tenke kontinua halo nia servisu, halo toos, halo natar no funsionáriu sira tenke servisu nafatin hanesan kna’ar ne’ebé asume atu bele garante estabilidade iha ita nia rai.

“Povu nia maturidade polítika boot tebes ona, povu hatene akompaña situasaun polítika iha rai laran no povu tuur hakmatek iha fatin hodi hateke ba leten katak sira iha nivel aas ne’e halo saida no rezolve problema oinsá,” Lu Olo louva. Hodi kontinua husu komprensaun povu nia atu husik Nai ulun sira mak rezolve problema polítika ne’ebé ohin loron Timor infrenta.

“Seidauk to’o tempu atu bele hola ona desizaun hodi bele responde povu nia hakarak maibé sei to’o tempu atu fó sai,” Lu Olo promete kona ba kompeténsia ne’ebé nu’udar Prezidente da Repúblika hola relasiona ho situasaun polítika ne’ebé Timor hasoru ohin loron.

(Jornalista : Zezito Silva)

(Editór : Manuel Pinto)

HUSIK IDA HATÁN