Lere Kontente, Xanana-Taur No Naimori Hakuak Malu

0
1719
Lere Anan Timur

DILI (TATOLI)—Xefe Estado Maiór Falintíl Forsa Defeza Timor Leste, Lere Anan Timur sente kontente bainhira haree iha liuhosi televizaun (TVTL & GMNTV) lider polítiku hosi CNRT, Kay Rala Xanana Gusmão (Maun Boot) hakuak Taur Matan Ruak ho Naimori.

Kay Rala Xanana Gusmão (Klaran) Taur Matan Ruak (los) ho José Naimori Bucar (Karuk)

ʺHorikalan ne’e, ha’u kontente kuandu ita nia lider nain tolu hasoru malu, Xanana Gusmão, Taur Matan Ruak no Naimori hodi hakuak malu, rein malu, tanis, ha’u kontente,” Lere Anan Timur fahe nia kontente ho jornalista sira iha Palásiu Prezidente da Repúblika, Bairru-Pité, hafoin halo enkontru ho Prezidente da Repúblika, Francisco Guterres Lu Olo, Ohin.

Nia dehan tan, nu’udar ema rezisténsia (gerrilleiru) sei sente kontente liu bainhira haree mós, Maun boot, Xanana Gusmão hakuak mós lider nasionál sira hanesan, Mari Alkatiri (atuál Primeiru Ministru), José Ramos Horta (actual membru governu) no Abílio Araujo, inklui lider jerasaun 1975 ne’ebé sei moris iha Timor.

“Se hakuak sira na’in tolu de’it ha’u kontente, maibé ladún, ha’u kontente liután bainhira hakuak sira hotu kedas,” Lere haktuir.

Antes ne’e mós Jenerál dehan, Partidu CNRT-PLP depende ba figura Xanana ho Taur Matan Ruak, maibé partidu Fretilín nu’udar partidu Istóriku.

“Bainhira Xanana la iha CNRT, CNRT la halo buat ida. Taur la iha PLP, PLP mós la halo buat ida. FRETILIN, partidu istóriku,” Majór Jenerál Lere Anan Timur hato’o iha Sentru Konvensaun Dili, Tersa (07/11) bainhira partisipa iha kongresu nasionál 12 Novembru ba daruak.

Iha tempu hanesan nia afirma iha eleisaun (2017), partidu balun manan, partidu balun lakon. Manan ne’e la’ós tanba nia polítika mak di’ak i tanba nia ema mak barak, tanba de’it figura.

No observa katak ohin loron, ema ne´ebé la gosta ema rezisténsia, la gosta nafatin, hakarak fahe ema rezisténsia, hodi iha biban atu sira ukun rai Timor. Tanba ne’e, hanesan veteranu, tenke asegura dignidade, prestíjiu maun-boot sira nian tan sira mak promotór ba ukun rasik.

Maun-boot sira mak hanesan, Kay Rala Xanana Gusmão, Mari Alkatiri, Ramos Horta, Abílio de Araújo inklui mós sira seluk tan.

“Ha´u akompaña situasaun polítika, ha’u mós estuda kondisaun polítiku sira nian, se mak ko´alia polítika loos, se mak uza polítika atu benefísiu nia aan,” majór jenerál Lere afirma. No husu veteranus sira ohin loron, presiza hamutuk iha pozisaun ida tantu Frente Diplomátika no Frente Armada ho mós Frente Klandestina hodi asegura veteranus nia dignidade, tanba lakohi ema ida book veteranus nia dignidade.

Majór Jenerál FALINTIL-Forsa Defeza Timor-Leste (F-FDTL), ne’e mós husu, ba lider  istóriku sira hanesan Mari Alkatiri, Xanana Gusmão, Ramos Horta, Taur Matan Ruak no sira seluk tan atu konsensu nune’e bele lori estabilidade no dezenvolvimentu mai Timor.

“Ita nia lider  sira liu-liu lider  primeiru jerasaun hanesan Mari Alkatiri, Xanana Gusmão no José Ramos Horta maka tenke konsensu. Tenke toma konxiénsia katak krize hotu-hotu ne’ebé akontese la’ós komunidade maka halo maibé lider  sira maka halo,” Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, foin lalais ne’e, hafoin informa situasaun seguransa no defeza ba Prezidente Repúblika, Dr. Francisco Guterres Lú Olo.

(Jornalista:Agapito dos Santos).

(Editór : Manuel Pinto)

HUSIK IDA HATÁN