La iha Orsamentu, Kualidade La iha

0
125
Ilustrasaun

DÍLI, (TATOLI)-Ensinu superiór sira, tantu públika no privada, iha Timor-Leste (TL) konsidera katak kualidade edukasaun ne’e importante maibé depende mós ba orsamentu husi estadu oinsá atu investe iha edukasaun.

“La iha orsamentu ita sei labele halo buat ida, ita labele ko’alia kona-ba kualidade tanba orsamentu nu’udar suportu importante hodi eleva kualidade,” hateten reitór Universidade Nasionál Timor Lorosa’e (UNTL), Francisco Miguel Martins ba media sira bainhira partisipa semináriu kona-ba ensinu superiór no empregu, organiza husi Ministériu Edukasaun no Kultura (MEK), iha Ministériu Finansa (MF), Ai-tarak laran, Díli, kuarta (22/11).

Tanba, tuir reitór UNTL, garante kualidade edukasaun alende kualidade iha profesór sira presiza mós infrastrutura ho kondisaun di’ak, sala aula ne’ebé mak di’ak, fasilidade iha sala aula, ekipamentu laboratóriu nian, biblioteka adekuada hodi eleva kualidade.

“Entaun kualidade ne’e prosesu integradu husi buat hotu,” subliña reitór UNTL hodi rekoñese katak kualidade iha profesór sira de’it la to’o.

Tanba ne’e nia reforsa katak atu eleva kualidade, presiza iha profesór kualidade apoiu mós ho infrastrutura, fasilidade, biblioteka no orsamentu.

Kona-ba fasilidade sira iha UNTL, reitór Francisco Miguel Martins informa katak oras ne’e dadaun UNTL organiza hela maske oituan-oituan.

“Iha tinan kotuk, ita inagura laboratóriu ida ba farmásia, nutrisaun no biokímika ba Fakuldade Medisina, ajudu husi Estadu Unidu iha Lahane,” informa reitór.

Nia informa tan katak tinan ida ne’e, ita iha laboratóriu, purezemplu ba Fakuldade Siénsia Ezata iha INFOREDEPE (Instituto de Formação Para Os Profisionais da Educação), Fakuldade Edukasaun, Arte no Umanidade (FEAU) kompostu hus departamentu Matemátika, Biolojia, Fizika no Kímika iha Fakuldade Eduksaun, maibé oras ne’e dadaun, iha laboratóriu ne’ebé bele dehan katak sei ho nível simples.

Presiza eleva tan, ita-nia governu, ita-nia estadu aposta iha kualidade edukasaun, presiza eleva tan fasilidade, ekipamentu laboratorál sira no biblioteka.

“Interesante tebes hodi dezenvolve ida ne’e tanba la iha ida ne’e, sei la bele ko’alia kona-ba kualidade,” dehan reitór Francisco Miguel Martins.

Iha fatin hanesan, Diretór Ezekutivu Fundasaun Kristal, Agostinho Gonçalves akresenta katak kualidade ne’e importante. Eskola sira, ensinu superiór sira hotu ne’ebé mak parseria ho governu ne’e hotu-hotu hakarak aposta ba kualidade.

Kualidade importante liu hotu ba ensinu superiór sira, tanba ne’e ita tenke halo planu asaun ne’ebé mak koresponde ba meta kualidade nian nu’udar foku importante.

Entaun, tenke investe iha fasilidade infrastrutura, rekursu umanu, dosente no padraun kurikúlu. Ne’e importante.

“Ami ensinu superiór CRISTAL no universidade privada sira, hotu-hotu parseiru governu nian tenke serbisu tuir, purezemplu, programa governu nian. Entaun ita tenke investe ba ida ne’e (kualidade-red) mezmu iha difikuldade,” hateten reitór Agostinho Gonçalves

Nia hatutan, ensinu superior sira dalaruma araska iha orsamentu, hetan mós apoiu husi estudante. La kobra barak liu.

“Ho mínimu ne’ebé mak iha ami tenke investe atu bele kobre despeza sira hotu tanba ita presiza investe ba iha kualidade. Purezemplu ba infrasturura, ba rekursu umanu,” nia akresenta.

Nia agradese mós ba governu nia apoiu ba Institutu CRISTAL mezmu ho subsídiu ne’ebé natoon. Maibé, atu aposta ba iha kualidade presiza rekursu umanu.

“Entaun governu tenke investe iha rekursu umanu,” konklui diretór Agostinho Gonçalves

Ministru Edukasaun no Kultura, Fernanda Hanjam informa katak polítika governu atu eleva kualidade ensinu superiór sira ne’e iha buat barak mak presiza haree, ida mak kurikúlu.

“Instituisaun sira hotu, públika eh privada, tenke hamutuk hodi ko’alia hamutuk relasaun ho kurikúlu. Seluk mak formasaun profesór, relasaun ho kualifikasaun akadémiku, maizmenus mestradu, hafoin ba doutoramentu. Ida ne’e mak ita-nia espetativa,” esplika membru governu konstitusionál da-hitu ne’e.

(Jornalista: Rafy Belo)

HUSIK IDA HATÁN