Kompaixaun Funsionáriu MT Sei Dukur

0
105
Ministru Turizmu, Manuel Florêncio Vong. Foto/MT.

DILI (TATOLI)-Ministru Turizmu, Manuel Florêncio de Canossa Vong, ho nakloke dehan, durante nia hala’o knaar nu’udar ministru iha Ministériu Turizmu (MT) nota katak, funsionáriu sira presiza uza matenek hodi dezenvolve Turizmu iha Timor-Leste.

Realidade iha MT nia observa sei iha funsionáriu ‘Baruk ten’ no konxiénsia toba hela de’it, inklui kompaixaun mós dukur hela de’it.

“Keta husik imi-nia matenek, keta husik imi-nia konxiénsia toba hela de’it, kompaixaun ne’e dukur hela de’it no keta husik ita-boot nia konsisténsia liu de’it. Ha’u de propózitu hakarak atu fó ida ne’e tanba fulan ida ona, ha’u bá Ministériu tama komesa tuku ualu no ha’u seidauk haree ita hotu hala’o ita-nia knaar ho didi’ak. Balun sei hamriik iha li’ur iha oras serbisu nian, sei konta istória no haktuir lia hirak ne’ebé lá presiza ita atu ko’alia”, Manuel hatete iha Sentru Konvensaun Dili, ohin.

Ho observasaun ne’ebé mak ministru ne’e iha mak nia dezafia pesoál Ministériu Turizmu atu uza matenek hodi dezenvolve Turizmu iha Timor-Leste no dezenvolvimentu ida ne’e hahú hadi’a husi uma-laran.

Tuir nia funsionáriu sira haknaar aan ba tanba fiar ida ne’ebé Estadu fó no halo kompromisu atu serve povu no nasaun ida ne’e liuhusi funsaun nu’udar funsionáriu.

“Balun hanoin bainhira loos mak Governu atu monu no ida ne’e la’ós ita-nia kompeténsia maibé kompeténsia mak atu serbisu,” Vong observa.

“Ita hotu konxiente katak ita simu osan husi Estadu ida ne’e selu ba ita, konxiente katak osan ida ne’e povu nian, konxiente katak ha’u ema timoroan, funsionáriu públiku prontu atu serve, kumpre no fazer cumprir a constituição e as leis. Ne’e ita-nia kompromisu boot tanba ne’e ha’u tau neon iha ita-boot sira”.

Nune’e ministru insentiva funsionáriu sira tanba turizmu mak indústria ne’ebé bele kontribui ba dezenvolvimentu ekonómiku, sosiál, kulturál no ambiente Timor-Leste nian, dezenvolvimentu ida sustentável ba rai ida ne’e.

“Ha’u enkoraja ita hotu atu haree situasaun ba oin, ita hakat bá oin. Buat ida ne’ebé ligadu ho Parlamentu ne’e ita entrega ba sira, buat ne’ebé ligadu ho polítika ita entrega ba polítiku sira. Ita-sira estudante haree ba ita-nia estudu, ita funsionáriu halo ita-nia knaar hanesan funsionáriu, ita-sira tékniku  halo knaar hanesan tékniku”.

 (Jornalista : Maria Auxiliadora)

(Editór : Manuel Pinto)

HUSIK IDA HATÁN