Komisaun C Sei Estuda Orsamentu Retifikativu

0
130
Deputadu Bankada Coselho Nacional Reconstrução Timor-Leste (CNRT), Natalino dos Santos.

DILI (TATOLI)-Deputadu CNRT, Natalino dos Santos informa katak, Orsamentu Rektifikativu (OR) oras ne’e daudaun iha ona komisaun C Parlamentu Nasionál no oras ne’e daudaun komisaun C sei halo pareser.

“No Comment” ba orsamentu retifikativu ne’ebé sei aprezenta husi governu konstitusionál da-hitu tanba pareser sei iha Komisaun C (Asuntu Finansa Públika),” deputadu CNRT, Natalino dos Santos ba jornalista sira iha Parlamentu Nasionál (PN), Kuarta (15/11).

Nia dehan, oras ne’e komisaun C sei diskute hela, hafoin komisaun C halo pareser no entrega pareser mak foin diskute.

Entretantu, antes ne’e, bankada CNRT rasik mós liuhusi nia komunikadu imprensa haktuir katak la iha dalan atu sétimu governu lideradu husi primeiru-ministru Marí Alkatiri atu hatama orsamentu retifikativu, tanba governu atuál nu’udar governu jestaun, tanba ne’e hein Parlamentu Nasionál aprova lai programa governu mak foin governu iha direitu submete orsamentu retifikativu.

Tuir CNRT, governu jestaun bele utiliza orsamentu jerál estadu 2017 nian to’o dezembru, karik liu sei aplika orsamentu DUO DÉCIMO ba despeza rekorente ba fulan janeiru no fevereiru 2018, se orsamentu estadu 2018 seidauk iha.

Alende ida ne’e, lei orsamentu jestaun finanseira fó dalan atu halo transferénsia bens e servico, kapitál menor no transferénsia públika nune’e la presiza orsamentu retifikativu atu halo ajustamentu, maibé halo transferénsia de’it ba orsamentu jerál estadu 2017.

Maibé, ajustamentu só halo tuir de’it estrutura orsamentu ne’ebé la’o dadaun, labele introduz fali ba projetu foun ka ministériu foun.

Seluk, xefe bankada PLP (Partidu Libertasaun Populár), Fidelis Magalhães deklara katak PLP sei afirma nia pozisaun bainhira governu da-hitu aprezenta tan nia programa daruak, PLP sei haree programa, sei halo diskusaun, depois sei iha apresiasaun iha Parlamentu, bankada sei hola pozisaun ida.

Nune’e mós relasiona ho orsamentu retifikativu, Fidelis esplika katak governu konstitusionál ne’ebé lidera husi primeiru-ministru, Marí Alkatiri bainhira aprezenta planu tenke tuir lei, tuir konstituisaun.

Iha konstituisaun ejize kondisaun ida katak programa governu ne’e tenke pasa. “Se programa governu liu-liu la pasa dala rua, governu la aprezenta orsamentu jerál estadu inklui orsamentu retifikativu,” nia salienta.

Apresiasaun programa governu nian define iha konstituisaun Repúblika Demokrátika de Timor-Leste (RDTL) artigu 109o no governu nia programa artigu 108o.

Artigu 108o (Governu nian Programa); 1.Wainhira Governu nomiadu ona, nia sei halo nia programa hodi hatudu nia objetivu no kna’ar oioin ne’ebé nia hakarak hala’o, medida ne’ebé atu uza no orientasaun polítika prinsipál sira-ne’ebé nia hakarak tuir iha domíniu atividade governu nian.

  1. Primeiru-Ministru hato’o programa governu nian ne’ebé Konsellu-Ministru aprova tiha ona ba Parlamentu Nasionál atu apresia iha prazu la liu loron tolunulu, sura husi loron ne’ebé governu hahú nia funsaun.

Artigu 109o (Apresiasaun ba Governu nia Programa); 1.Programa governu nian sei hato’o ba Parlamentu Nasionál atu hetan apresiasaun, no Parlamentu la funsionál karik, tenke konvida ka konvoka sira ba asuntu ida-ne’e.

  1. Debate programa governu nian labele liu loron lima, no to’o remata, grupu ida-idak iha Parlamentu bele husu atu lasimu, eh governu bele husu votu konfiansa ida.
  1. Atu lasimu programa governu nian, tenke iha apoiu mai husi maioria deputadu husi sira-ne’ebé sei hala’o hela kna’ar.

 (Jornalista: Rafy Belo)

(Editór : Manuel Pinto)

HUSIK IDA HATÁN