COVALIMA (TATOLI)-Ministru Adjuntu Primeiru-Ministru Asuntu Governasaun (MAPMAG), José Reis reprezenta governu da-hitu konstitusionál hala´o vizita traballu ba munisípiu Covalima hodi haree progresu no preparasaun ba komemorasaun 28 Novembru.
Iha vizita ne’e observa mos kondisaun bee no eletrisidade ne´ebé sei uza hodi fasilita eventu komemorasaun 28 Novembru.
“Ita hotu-hotu rona katak Suai ne´e problema bee maka´as teb-tebes maibé rona tiha husi diresaun água i saneamentu nian, sira halo ona preparasaun di´ak i sira garante katak 28 novembru sira bele garante bee ba iha komunidade, ba iha serimónia ne´e bele la´o di´ak,” informa ministru adjuntu primeiru-ministru, José Reis ba media sira iha sede administrasaun, Suai-Covalima, iha fin-de-semana ne´e.
Kona-ba eletrisidade, governante ne´e akresenta katak ne´e la´ós problema boot, la´o di´ak tan governu konstitusionál da-lima no da-neen halo ona investimentu boot ba iha eletrisidade, maibé presiza mós halo preparasaun ligadu ho komemorasaun ne´e.
“Presizamente ligasaun ba iha fatin ne´ebé mak halo serimónia atu bele garante, prinsipalmente ba fatin ne´ebé atu halo serimónia” ministru adjuntu José Reis akresenta.
Administradór Munisípiu Covalima, Fernando Nogueira Nahak informa katak preparasaun ba komemorasaun 28 novembru ba dala 42 ne´e, feira fatin mós prontu ona, fatin isar bandeira no fatin ba bainaka sira prepara ona, saneamentu mós prepara ona.
“Hein tan komisaun sira husi nasionál mai atu bele dezenvolve di´ak liutan 28 novembru ne´e,” informa administradór ne´e.
Komemorasaun loron istóriku iha Munisípiu Covalima, tinan ne´e, harame ona ho atividade desportiva no iha loron komemorasaun sei hala´o mós jogu eh atividade tradisionál sira oi-oin.
Preprasaun no fasilidade ba eventu 28 novembru ne´ebé realiza iha Munisípiu Covalima ne´e mós sei reforsa husi autoridade nasionál, Diresaun Nasionál Bee no Saneamentu, liu-liu disponibiliza tan kareta tanki tolu no casa de banho movel atu bele halo kobertura ba iha nesesidade ne´ebé presiza.
Entretantu, hafoin ba haree no rona informasaun kona-ba progresu preparasaun 28 novembru, Ministru Adjuntu Primeiru-Ministru, José Reis mós vizita planta eletrisidade, Betano, Munisípiu Maunfahe hodi observa no haree funsionamentu servisu eletrisidade iha fatin refere.
(Jornalista: Rafy Belo)
(Editór : Manuel Pinto)