Komemora 12 Novembru, Branco Husu Halo Reflesaun

0
24
Deputadu, Francisco Branco

DILI (TATOLI) – Xefe Bankada FRETILIN, Francisco Branco husu ba públiku no polítiku sira atu halo reflesaun iha komemorasaun dala-26 masakre Santa Cruz, ne’ebe sei selebra iha Domingu ne’e, hodi hanoin hikas juventude sira ne’ebé fó nia hirus matan, iha tempu ne’ebá.

Nia dehan, Masakre Santa Cruz iha 12 Novembru tinan 1991, loke ona Timor-Leste ba pájina mundu nune’e istória ne’e la’ós atu selebra de’it maibé tenke halo mós reflesaun.

“Istória Masakre Santa Cruz tenke halo reflesaun tanba  iha momentu istória ne’ebé Timor-Leste atu halo tranzisaun lideransa jerasaun tuan ba jerasaun foun,” Francisco Branco informa ba jornalista sira iha Parlamentu Nasionál (PN), Sesta (10/11).

Nia hatutan, sei halo reflesaun ba 12 Novembru tanba iha momentu ne’e joven maioria mak mate. Sira ne’e hatudu katak, komesa entrega luta rezisténsia la’ós de’it ba Frente Armada maibé komesa muda ona ba Frente Klandestina, hafoin remata negosiasaun Timor-Leste atu deside hili ninian destinu ba futuru.

Ho ida ne’e mak, sidadaun hotu liu-liu polítiku sira tenke deside ho konsensu no sentidu estadu. Hodi tau as interese ne’ebé boot liu ba destinu nasaun nian do que interese partidu ninian. Hanesan juventude sira ne’ebé mate iha 12 Novembru maski sira nurak maibé brani mate iha Santa Cruz tanba hakarak buat ida di’ak ba futuru sira ninian nasaun ne’ebé hetan invazaun hosi Indonézia.

“Haforsa tan ita atu halo reflesaun ne’ebé kle’an no luan atu ita hamutuk hodi hanoin hikas ba sira ne’ebé fó sira nia hirus matan, iha tempu ne’ebá dehan loriku asuwa’in,” Xefe bankada Fretilín ne’e husu.

Tuir nia, loriku sira nia isin sei nurak, sira fó sira nia isin, ran fakar iha ne’ebá la’ós ba ita atu deside ohin loron destinu nasaun nian konforme ita idak-idak nia hakarak maibé tenke respeita mós ba sira.

(Jornalista: Julia Chatarina)

(Editór : Manuel Pinto)

HUSIK IDA HATÁN